Panica bancària estatsunidenca de 1907

La Panica bancària estatsunidenca de 1907 es una crisi financiera que se debanèt ais Estats Units en octòbre de 1907 quand lo mercat borsier s'afondrèt après una temptativa mancada de corner còntra leis accions de la companhiá United Copper. Lei bancas qu'avián participat a l'operacion foguèron victimas de retiraments massís de fons. Lo fenomèn se propaguèt a mai d'una banca de detalh ò d'investiment, çò qu'entraïnèt la difusion de la crisi a la totalitat dau sector bancari estatsunidenc. Fòrça bancas fèron falhida fins a l'intervencion dau financier John Pierpont Morgan (1837-1913) qu'engatjèt sei fons pròpris per sostenir lo sistèma bancari. Morgan capitèt de convéncer d'autrei banquiers importants de l'imitar. Aquò permetèt pauc a cha pauc de restaurar lo calma en novembre. Pasmens, durant aqueu mes, una operacion novèla d'especulacion entraïnèt una panica novèla e menacèt l'estabilitat de l'U.S. Steel. En fàcia de la gravetat de la situacion, lo govèrn de Theodore Roosevelt prenguèt dirèctament lo contraròtle de la companhiá per arrestar definitivament la crisi.

Wall Street durant la crisi.

L'enquista sus leis eveniments foguèt mai que mai menada per lo senator Nelson W. Aldrich (1841-1915). Segon eu l'abséncia d'una banca centrala èra un dei factors aguent permés l'agravament de la panica. Inicièt donc lo procès que menèt, lo 22 de decembre de 1913, a la creacion de la Resèrva Federala deis Estats Units.

Liames intèrnes

• Banca.
• Crisi financiera.
• Resèrva Federala deis Estats Units.

Bibliografia

• Robert F. Bruner e Sean D. Carr, The Panic of 1907: Lessons Learned from the Market's Perfect Storm, Hoboken, John Wiley & Sons, 2007.
• Charles P. Kindleberger e Robert Aliber, Manias, Panics, and Crashes: A History of Financial Crises, 5^a edicion, Hoboken, John Wiley & Sons, 2005.