Pau Albarèl

Pau Albarèl (Sant Andrieu de Ròcalonga, Lengadòc, 12 de decembre de 1873 – Montpelhièr, 15 de julhet de 1929) foguèt un felibre del país de Narbona.

Biografia

Pau Albarèl nasquèt dins una familha modèsta, filh d'Alexandrina Albèrt e de Joan Albarèl qu' èra lo faure de Sant Andrieu^[1] Aprèp qu'estudièt al vilatge foguèt mandat al Petit Seminari de Narbona. I faguèt d'estudis de granda qualitat e aprèp qu'obtenguèsse son bachilierat, Albarèl s'inscriguèt a la Facultat de Medecina de Montpelhièr. I presentèt una tèsi sus la patologia del raquitisme e en seguida venguèt mètge, plan jove qu'en aquel temps aviá pas que 22 ans. S'installèt bèl primièr a Carcassona abans de venir generalista a Nevian, puèi a Narbona en 1909, ont se faguèt membre de la Comission arqueologica. A Nevian, se maridèt amb Lúcia Agèl, lo 24 d'octobre de 1899. Quand comencèt la Primièra Guèrra Mondiala serviguèt coma mètge e foguèt mandat a Salonica. Comencèt d'escriure en occitan en seguir l'influéncia d'Aquiles Mir e usèt de mantun escais literari Joan de la Ròca, Balin balan, Joan de la Pineda, lo Bascalaire, lo Piuletaire, Jirmèn lo Vièlh e d'autres per menar una òbra abondosa e de qualitat.

En 1911 fondèt la revista audenca La cigala narbonesa e èra membre de l'Escòla mondina e de l'Escòla audenca. Venguèt puèi Majoral del Felibritge en 1918. Se moriguèt a Montpelhièr dins una clinica en seguida d'una operacion medicala lo 15 de julhet de 1929.

Òbras

• L'esperit tustaire, farça en 2 actes, Tolosa, Bertomieu, 1903
• Viva lo vin, farcejada en 1 acte, en vèrses narboneses, id. 1904.
• Margarideta, comedia en 3 actes, id. 1905
• Pastorala, 1909.
• Los meses, rondèls, Narbona,1909
• Orionda, legenda narbonesa, id. 1913
• A la qu'espotiguèt Montfòrt , id.
• Lo pauràs, scèna de vendémia, id.
• La votz de la pineda, poesias, amb prefaci d'en Valèri Bernard, Narbona, Calhard, 1914
• Los ulhals de Montlaurés, legenda narbonesa, 1921.
• Lo trauc de la fada, 1922.
• La femna muda, comedia en 1 acte, Narbona, Brieu, 1922
• La taca de familha, id
• La lenga mairala, comedia en 1 acte, id
• L'eiretatge, comedia en 1 acte, id 1925
• Pirèna, legenda poëtica, id 1927
• Las anguialas de la menina, id
• Lo camin de la crotz, id

Bibliografia

• La Cigala narbonesa, num. 138, agost-octobre de 1929
• La Cigala lengadociana, num.192
• Revista Lo Gai saber, Auton de 1929
• Joan Forièr A l'entorn del centenari de Pau Albarèl , id num. 376, octobre de 1974
• Jean Fourié (2009). Dictionnaire des auteurs de langue d'oc de 1800 à nos jours (en francés). Felibrige Edicioun, p. 12. ISBN 978-2-9533591-0-7.