Radomir Putnik

Radomir Putnik (24 de genier de 1847, Kragujevac - 17 de mai de 1917, Niça) es un mareschau e ministre de la Guerra serbe que tenguèt un ròtle centrau durant las guerras balcanicas e la Prumiera Guerra Mondiala.

Fotografia de Radomir Putnik.

Engatjat dins las fòrças armaas serbas tre los ans 1860, participèt a las guerras menaas per Serbia durant lo segle XIX. Nomat generau en 1903, foguèt ministre de la Guerra en 1904, 1906-1908 e 1912. S'ocupèt d'organizar e d'equipar sas fòrças d'un biais moderne gràcias a l'ajua de França e de Russia. Comandèt l'armaa serba durant las doas guerras balcanicas e durant la prumiera partia de la Prumiera Guerra Mondiala. A l'origina de las victòrias decisivas de Kumanovo e de Bitolj, venguèt lo prumier mareschau de l'istòria serba en 1912. Durant la Prumiera Guerra Mondiala, organizèt las defensas còntra las atacas austrianas e participèt als succès defensius serbes de Sabac (aost de 1914), de Valjevo (setembre) e de Rudnik. Puei, dirigiguèt la retiraa vers la mar Adriatica en 1915. Malaut e fatigat, moriguèt a Niça en 1917.

Ligams internes

• Prumiera Guerra Mondiala.

Bibliografia

• (en) David Jordan, The Balkans, Italy & Africa 1914–1918: From Sarajevo to the Piave and Lake Tanganyika, Londres, Amber Books, 2008.