Sieisena crosada

La Sieisena crosada es una expedicion militara organizaa per l'emperaire Frederic II per tornar conquistar los territòris del Reiaume de Jerusalem perduts après las conquistas de Saladin.

Leis estats latins après la Sieisena Crosada e la crosada de 1239-1241.

Aient formulat un vòt de crosada en 1215, Frederic II deuguèt passar plusors annaas per estabilizar sas possessions dins lo Sant Emperi e dins lo Reiaume de Sicília. Retardèt donc son despart mai d'un còp e foguèt excomunicat per lo papa Gregòri IX, un de sos adversaris politics en Itàlia, en 1227. S'embarquèt en junh de 1228 e deuguèt combatre las temptativas dau poder pontificau de sabotar l'expedicion. En particular, Gregòri IX sostenguèt las invasions de Sicília menaas per Joan de Brienne.

En Palestina, Frederic II dispausava pas de fòrças importantas car los Francés e los Italians chausiguèron de seguir los òrdres dels representents dau papa. L'emperaire s'installèt donc a Jaffa onte restaurèt las fortificacions. Puei, s'interessèt als conflictes entre los diferents senhors aiubidas. Aquò li permetèt de se raprochar dau sultan Al-Malik al-Kamil. Poguèt ansin negociar la restitucion pacifica de Jerusalem en chambi d'una treva de 10 ans, de la destruccion de las muralhas de la vila e dau respècte dels drechs de la populacion musulmana (tractat de Jaffa, 11 de febrier de 1229).

L'emperaire foguèt coronat rei de Jerusalem lo 18 de març, mas abandonèt rapidament la vila. Lo 10 de mai, quitèt Palestina per s'entornar en Itàlia. Laissèt los estats francs dins una situacion malaisia. D'efiech, se Jerusalem èra tornarmai crestiana, la vila èra vengua indefendabla e los eleits locaus èran devesits entre partisans e adversaris de l'emepraire.

Ligams internes

• Al-Malik al-Kamil.
• Crosada.
• Frederic II.

Bibliografia

• (fr) Pierre Boulle, L’Étrange Croisade de l’Empereur Frédéric II, Flammarion, 1968.
• (fr) René Grousset, Histoire des croisades et du royaume franc de Jérusalem - III. 1188-1291 L'anarchie franque, París, Perrin, 1936 (reimpr. 2006), 902 p.
• (fr) Ernst Kantorowicz, L'Empereur Frédéric II, Éditions Gallimard, coll. « Bibliothèque illustrée des histoires », 1987, 657 p.