Unicòrn (constellacion)

Monoceros (Unicòrn en occitan) es una constellacion de l'emisfèri sud definida en 1624 per l'astronòm alemand Jakob Bartsch (vèrs 1600 - 1633). Son nom es la forma latina d'un mot grèc ancian que sa significacion èra unicòrn. Ocupa l'espaci situat entre lei tres estelas dau Triangle de l'Ivèrn (Sirius, Betelgeuse e Procyon).

Traçat modèrne de la constellacion de l'unicòrn.

Istòria

Monoceros es una constellacion relativament modèrna que foguèt suggerida per lo premier còp en 1612 ò 1613 per lo Neerlandés Petrus Plancius (1552-1622) e definida en 1624 per l'Alemand Jakob Bartsch (vèrs 1600 - 1633). Aquò èra lo prolongament d'una idèa apareguda au sègle XIII de traçar un cavau a partir deis estelas gaire lusentas situadas au sud dei constellacions dau Càncer e dei Geminis. D'astronòms persans semblan aver agut la meteissa idèa.

Estelas principalas

Monoceros es una constellacion malaisada d'observar car totei seis estelas de la constellacion, compres lei pus importantas, an una luminositat febla :

• β Monocerotis (dicha Cerastes) es l'estela pus lusenta amb una magnitud aparenta de 3,76. Es un sistèma triple situat a aperaquí 690 annadas lutz format d'estelas de color blanca ò blava.
• α Monocerotis (dicha Lucida ò Ctesias) a una magnitud aparenta de 3,94. Es una naneta jauna situada a 144 al de la Tèrra.
• γ Monocerotis' (dicha Tempestris) es una giganta arange situada a 645 al. Sa magnitud es de 3,99.
• δ Monocerotis' (dicha Kartajan ò Kargadan) es una estela blanca de la sequéncia principala que tèn una magnitud de 4,15 e qu'es situada a 375 al.

Objècts celèsts de remarca

Fotografia de l'amàs dubèrt M 50.

Monoceros tèn plusors objècts celèsts de remarca :

• M 50 es un amàs dubèrt descubèrt en 1772 per Charles Messier (1730-1817). Compta aperaquí 200 estelas e son temps es estimat a 78 milions d'annadas.
• Nebulosa de la Roseta qu'es una nebulosa difusa situada a 4 900 al de la Tèrra. A una magnitud aparenta de 6 e un diamètre d'un centenau d'annadas lutz.
• NGC 2264 que gropa un amàs dubèrt (Amàs de l'Aubre de Nadau) e una nebulosa difusa (Nebulosa dau Còne).

Liames intèrnes

Bibliografia