Bastèl

Bastèl ta un instrumento di perkushon di antaño di Kòrsou, ku ta konsistí di un tobo yená tres kuart ku awa i un kalbas (crescentia cujete) ku ta flota riba awa ku su banda kòrá ariba. Un nèt trahá di kabuya tabata wòrdu di span riba e superfisie di awa pa sostené e kalbas. E bastèl tabata wòrdu toká ku e punta di dede i palma di man batiendo riba e banda kòrá di e kalbas.^[1]

 E artíkulo aki ta skirbí na ortografia di papiamentu. Lo ta apresiá si por mantené e artíkulo aki na estilo di papiamentu.

E bastèl a wòrdu usá komo un instrumento inspiradó i di sosten rítmiko pa komponé kantika di seú, tambe yamá kantika makamba. P'esei e kantikanan aki tabata wòrdu yamá kantika di bastèl òf simplemente bastèl. E baile di fiesta di kosecha òf seú tambe ta wòrdu yamá bastèl. E baile aki tabata wòrdu ehekutá riba kantikanan di seú, akompañá pa e instrumentonan tambú, kachu i agan. Ta probabel ku e bastèl a wòrdu kreá pa remplasá e tambú prohibí.^[2] E letra di kantikanan di bastèl den idioma metafóriko tabata protestanan kontra inhustisia sosial.^[3]

Ora un tambor di awa wòrdu toka ku man, e tabata wòrdu yamá bastèl; ora tabata usa dos palu largu pa toka, e tabata wòrdu yamá seú.^[2]

Tambor di awa