Moneda

Moneda (nomber colectivo: cen) ta un pida material, mayoria di biaha rondo, plat y di metal, cu ta wordo uza como placa. Normalmente, moneda tin un balor nominal mas abou cu placa di papel, ademas, e ta indica e nomber di e pais of instancia, denominacion (unidad monetario y cantidad, por ehempel Afl. 0,50), y aña. Tin excepcion na cada moneda.

 E articulo aki ta uza ortografia di Papiamento. Lo aprecia si por mantene e articulo aki na estilo di Papiamento.

Pa unidad monetario, wak Valuta.

Moneda di Kolonia Kòrsou (1947)

Tradicionalmente, e balor di un moneda tabata igual na e balor di e material di cual e moneda ta traha, pero mayoria di moneda cu ta den uzo actual tin, solamente, balor di placa fiat.

Prome monedanan

Moneda chines di diferente periodo

Malchi pa monedanan chines for di dinastia Han (mas o menos 200 p.C.–200 d.C.)

Monedanan a wordo inventa independientemente na tres diferente luga, mas o menos durante e mesun periodo. Na China e prome 'monedanan' a wordo produci for di alrededor di 770 p.C. Esakinan tabata simbolo di obhetonan valioso, e asina yama 'placa di cuchu y spada': modelonan di cuchu y spada cu caracternan individual, basha den brons. Rond di e mesun tempo, e prome kepengs a aparece, monedanan chikito rondo cu un buraco cuadra den nan pa nan por a wordo mara na un cabuya. Kepengs a keda den uzo pa mas cu 2.500 aña, te na cuminsamento di siglo binti.

Moneda di Lidia di mas o ménos 550 p.K., tempo di Rei Creso, cu un leon y un toro.

Tetradracma, un moneda di periodo griego clasico, bati den e colonia griego di Siracusa, mas o ménos 415–405 p.C.

Den e mundo occidental, e prome monedanan a wordo produci meymey di siglo shete p.C. traha na Lidia (Asia Menor). E monedanan aki tabata consisti di gotanan di electrum, un liga metalico natural di oro i plata, cu un imagen na un banda y un stempel sin nificacion na e otro. E invencion nobo aki a facilita comercio y a plama masha lihe pa parti oost (e Imperio perso) y west (e mundo griego). Pronto, e monedanan occidental a tuma e forma cu nan tin te awendia: un plachi di metal rondo cu un diameter entre 1.5 y 4.0 centimeter, cu un imagen di un cabes na e parti dilanti y un representacion simbolico na e parti patras, hopi biaha rondona pa texto. Aunke monedanan basha tambe a aparece na Europa y Asia Menor, mayoria di monedanan tabata wordo bati: un snechi metal, keinta of no, tabata wordo poni den un malchi y un imagen ta wordo primi of bati bou preshon halto.

Moneda di India cu contra marca di dinastia Nanda di Magadha. E cinco sombolonan riba e moneda aki ta: solo, seis brasa (Magadha), toro riba sero, Indradhvaja rondona pa cuater baca, olifante. Tambe tin un contramarca no-ofisial na e parti patras.

Moneda traha na India di e rei indo-griego Heliocles II (rond di 90 p.C.). Monedanan cuadra ta wordo haya principalmente na India.

Na India e prome monedanan a wordo produci rond di aña 500 p.C. Esakinan tabata pidanan plat di plata cu un forma iregular, riba cua nan tabata aplica varios stempel chikito cu simbolo di mata of bestia. For di tempo di Alexander e Grandi, e monedanan traha cu e tecnica di contramarca a wordo reemplasa gradualmente pa e representacion di moneda griego.