Randstad

Randstad ta un área metrópolis, wèst di Hulanda, kaminda vários aglomerashon i sentro di stat a krese huntu òf ta kresiendo ainda. E área multi-núkleo urbano aki tambe ta wòrdu yamá un konurbashon.

 E artíkulo aki ta skirbí na ortografia di papiamentu. Lo ta apresiá si por mantené e artíkulo aki na estilo di papiamentu.

Randstad

Mapa skemátiko di Randstad

E definishon eksakto di Randstad ta varia, pero en todo kaso e ta inklui e kuater aglomerashonnan urbano mas grandi na Hulanda: Amsterdam, Rotterdam, Den Haag i Utrecht. Komo ku Almere ta e stat ku e ekspanshon i kresementu di mas grandi na Hulanda, hopi bes ta wòrdu konsiderá komo parti di Randstad, Flevoland tambe ta wòrdu inkluí den e konurbashon aki komo e di kuater provinsia. E ta kubri 15 porshento di e superfisie di Hulanda i ta inkluí un terser parti di e área urbano di Hulanda.

Ku un poblashon ku ta varia entre 4.5 mion (na 2006) i mas ku 8.3 mion (na 2020) habitante, e Randstad ta e konurbashon di mas grandi na Hulanda i un di e (semi-)aglomerashonnan di mas grandi na Oropa. Apesar di su tamaño, Randstad no ta un unidat atministrativo. Desishonnan polítiko ta wòrdu tumá dor di e gobièrnu, provinsia, munisipionan, i relashon kooperativo manera e Zuidvleugel, Noordvleugel, i e region di Utrecht.