حسن بن صباح
From Wikipedia, the free encyclopedia
حسن بن صباح اسماعیلی فرقے دی اک دہشت پسند تے خفیہ جماعت دا بانی سی تے مشرقی ایران دے شہر قم چ پیدا ہوئیا ۔ اسدا پیؤ کوفہ دا رہن والا سی ۔ 1071ء چ ایہہ مصر گئیا تے اوتھوں خلافت فاطمیہ دے خلیفہ المستنصر دا داعی بن کے واپس فارس آئیا تے یزد ، کرمان تے طبرستان چ فاطمیاں دے حق چ پراپیگنڈا چ مصروف ہوگئیا ۔ کہندے نیں کہ ایہہ نظام الملک طوسی تے عمر خیام دا ہم سبق سی پر بعد چ اسدا نظام الملک نال اختلاف ہوگئیا تے سلجوق سلطنت دے فرمانرواء ملک شاہ اول نے اسنوں گرفتار کرن دا حکم دے دتا ۔ اس نے 1090ء چ کوہ البرز چ الموت دے قلعے تے قبضہ کرلئیا جہڑا کہ قزوین تے رشت دے رستے چ اے ۔ کئی دوجے قلعے وی اسماعیلیاں دے قبضے چ آگئے ۔ 1094ء چ مصر دے اسماعیلیاں نال قطع تعلق کرلئیا ۔ اپنے آپ نوں شیخ الجبال نامزد کیتا تے قلعہ الموت دے نیڑے دے علاقیاں تے اپنی اک چھوٹی جہی آزاد ریاست قائم کرلئی ۔ فیر اپنے پیروکاراں دا اک سلسلہ شروع کیتا جس چ داعی تے فدائی بہت مشہور ہوئے ۔ فدائیاں دا کم تحریک دے دشمناں نوں خفیہ طور تے خنجر نال مارنا سی ۔ بہت سارے مسلمان تے عیسائی اینہاں فدائیاں ہتھوں قتل ہوئے ۔ دہشت گردی دی ایہہ تحریک اینی منظم سی کہ مشرق وسطی دے سارے بادشاہ استوں ڈردے سن ۔ کہندے نیں کہ حسن بن صباح اپنے فدائیاں نوں حشیش[گانجا] پلا کے بے ہوش کردا تے اوہناں نوں فردوس دی سیر کرواندا جتھے خوبصوت کڑیاں [جہڑیاں کہ اکثر اغوا کیتیاں ہوئیاں ہندیاں سن]حوراں دے روپ اینہاں دی سیوا کردیاں تے فیر پہلے دی طرح اوہ فدائیاں نوں حشیش نال بے ہوش کر کے اس فردوس توں باہر لے آندا تے فدائی اس فردوس چ دوبارہ جان دی تڑپ چ اس دا ہر حکم مندے ، کیونجے حسن بن صباح کامیابی دی صورت چ اینہاں نوں دوبارہ فردوس چ گھلن دا وعدہ کردا سی۔ایہہ فردوس اس نے وادی الموت چ بنائی ہوئی سی ۔
حسن بن صباح نے طویل عمر پائی تے اس دے بعد اسدا اک نائب بزرگ امیر اسدا جانشین بنیا ۔ اس جماعت دا خاتمہ ہلاکو خان دے ہتھوں ہوئیا جس نے قلعہ الموت نوں فتح کرکے حسن بن صباح دے آخری جانشین رکن الدین نوں گرفتار کرلئیا تے ہزاراں فدائیاں نوں بے رحمی نال قتل کردتا۔