Інтерфийса

Інтерфи́йса (до 2022 стилізована ги InterФийса) тото некомерційноє русинськоє інтернетовоє уданя, тематика котрого ся головно кыват компютерної технікы, популарної наукы тай еколоґії. На юній 2025. рока редакція Інтерфийсы ся чинит Мигальом Лыжечком и Петром Біровом. Такой они пишут булшину матеріалув, айбо пущавут ся ай гостьові статі.

Інтерфийса
Филь	некомерційноє інтернетовоє уданя
Закладено	23. януара 2021
Редакція	Мигаль Лыжечко, Петро Біров
Вебсайт	interfyisa.com

Історія

Проєкт быв закладеный ги „InterФийса“ 23. януара 2021. рока Мигальом Лыжечком у виді Telegram-канала из вістями за компютерну техніку и популарнонаучными статями. Датум быв нароком убратый десятьрочом закладеня русинської Вікіпедії.^[1] Назывку-портманто уд анґл. interface тай русин. фейса (фийса) угадала цімборка Лыжечка Марія.^[2]

Команда провела ребрендінґ и редізайн 23. януара 2022. рока, помінявши стилізацію назывкы на „Інтерфийса“.

23. юлія 2022 уданя дустало свуй вебсайт; сперед сим май довгі статі, котрі перевысшовали ограниченя на знакы у Telegram, публіковали ся раз на платформі Telegraph уд розробникув Telegram, а пак на похожому сторонньому сервісови Teletype. Неновосні матеріалы товды были перенесені на вебсайт, а Telegraph тай Teletype перестали ся хосновати.^[3]

Інтерфийса: Убрані статї 2024

У 2024. році редакція Інтерфийсы анонсовала выход фізичної книжкы з убраныма матеріалами, котрі ся сперед тым публіковали на вебсайті; из цінов єдного дараба в 300 украйинськых гривнюв половину выручкы з продажув плановало ся передасти на пудпору Збройных сил Украйины.^[4]

На зачаткови 2025. року книга уйшла тиражом у 300 дарабув; вмісто зачатковых планув за половину выручкы, 100% из продажув пушло на „Рух підтримки закарпатських військових“.^[5] У книгу зайшли 15 статий: 12 из них ся публіковали сперед тым на сайті проєкта, 3 стали дочасныма ексклузивами папірьового уданя.

2. фебруара 2025 книга „Інтерфийса: Убрані статї 2024“ была представлена на закрытуй презентації у комуналному закладі „Ужгородська публічна бібліотека“,^[2][5] а пак 19. мая 2025 пруйшла щи єдна презентація, уже у рудному селови Лыжечка, у Кушницькому ліцейови. На май 2025. рока из продажув книгы на „Рух підтримки закарпатських військових“ ся назбирало 50,000 гривнюв.^[6]