Александер Флеминг

Александер Флеминг, англ. Sir Alexander Fleming, *6. август 1881, фарма Лохфилд коло Дарвела в Шкоции – †11. марец 1955, Лондон, Велика Британия — британскый бактериолог и дохтор, найвецей познатый як объявитель пеницилину.^[1][2][3]

Александер Флеминг Александер Флеминг
Sir Alexander Fleming англ.
Познатый як	объявитель пеницилину
Горожанство	Велика Брітанія
Уроджѣня	авґуста 6., 1881(1881-08-06) Дарвел, Шкоция
Упокоеня	марца 11., 1955 (73 р.)
Лондон, Велика Британия
Причина	инфаркт миокарда
Похованя	собор Святого Павла 6161
Научна робота
Сферы наук	бактериология, фармакология
Alma mater	Имперскый коледж Лондона, Вестминстерска универзита
Узнаня
Членство в	Лондонске кральовске общество (18 марец 1943)
Одзнакы
Нобелова награда, 1945, з физиологии и медицины
Александер Флеминг на Викискладѣ VIAF:69004123; GND:118533894; LCCN:n83228021; FAST:122327; BNF:123502654; OL:OL172641A, OL4395458A; Ту можуть быти податкы з Wikidata, не контролованы авторами статѣ

Его роботу продовжили Говард Флори и Ернст Борис Чейн, а в року 1945 довъедна трьоме были вызнаменаны як Нобеловы лавреаты з физиологии и медицины.

Биография

Александер Флеминг походив з родины фармера, де быв семый дѣтвак з восьмерох (третий зоз штырьох дѣти од другой жены фармера). Сельскый живот в Шкоции заострив его дар техничной вынаходливости и быстрое око. По закончѣню мѣстных школ, в року 1895, одышов до Лондону, ку свому старшому братови Томасу, котрый там працовав як окулиста. Спочатку штудовав на политехницѣ и служив яко шпедитор. Але в року 1901, коли достав пѣнязьне наслѣдство од стрыя, послухав брата Томаса и тоты грошѣ инвестовав до штудий медицины. Абсолвовав медицинску школу при Шпиталю Св. Марии и зыскав диплому MBBS бакаларя медицины и хирургии з одзнаков (1901–1906).^[1] Быв добровольцем шкотского лондонского регимента и членом стрѣлецкого клуба шпиталя, а так капитан клуба, жебы го утримати, понукнув му мѣсто асистента в шпитальской бактериологичной лаборатории Алмрота Райта, котра ся занимала вакцинами ай имунологиев. В року 1908 Александер Флеминг зыскав ступень BSc бакаларя наук з бактериологии зо златов медалиов и зостав за преподавателя на той медицинской школѣ до року 1914. В роках 1914–1918 служив як войсковый медик. В роках 1918–1954 вернув ся в лабораторию Шпиталю Св. Марии, од року 1946 ей директор, од року 1928 професор, в роках 1948–1955 тыж професор Лондонской универзиты, в роках 1951–1954 тыж ректор Единбургской универзиты.^[2]

Научны объявлѣня

Антисептика

В рокы Первой свѣтовой войны А. Флеминг працовав в Медицинском корпусѣ Кральовской армады и яко бактериолог, штудовав инфекции ран в лаборатории Райта, перенесеной до Франции. Там они прийшли на то, же не мож поуживати сильны антисептикы на глубокы раны. В року 1917 в медицинском журналѣ The Lancet А. Флеминг описав експеримент, котрым доказав, же такый поступ за цѣлу войну забив веце воякох, як сама инфекция, и рекомендовав просто чистити раны мягкым соляным ростопом.

Лизоцим

В року 1922 А. Флеминг объявив лизоцим,^[2][3] ензим, котрый ся находить в розличных гленах людского тѣла, такых як слина, слызы або смолѣ. Выявило ся, же лизоцим мать мягкый антисептичный ефект и помалы роспущать бактерии. Нажаль, не мать учинку против найпатогеннѣйшых бактерий. Сам А. Флеминг тото объявлѣня поважовав за свой найвекшый принос в науку.^[1]

Пеницилин

В септембрѣ 1928 А. Флеминг замерьковав плѣсньовый грибок на скляной пластинцѣ з културов бактерий стафилокока Staphylococcus aureus, котру тогды штудовав, и рѣшив мерьковати дале, што з того буде. Так выявив, же тот грибок рода Penicillium продукуе субстанцию, котра спомалюе рост бактерий. Быв очевидный клиничный потенциал той субстанции, котру он назвав пеницилином: быв то первый антибиотик. Хоть А. Флеминг не годен быв выпродуковати го во векшый колькостях, ани екстраговати главну активну зложку, але в року 1929 опубликовав информацию о пеницилинѣ.^[4]

Интересны факты

• Публикация о пеницилинѣ не пробудила интерес ани в 1930-х роках, хоть А. Флеминг не переставав о том говорити, гледав помочь од каждого хемика и 12 рокы продовжовав сохраняти и вырощовати оригиналну културу грибка Penicillium.
• Аж в року 1940 Ернст Борис Чейн и Едвард Абрагам опубликовали свои штудии о штруктурѣ молекулы пеницилина, Говард Флори в року 1941 зачав клиничны выпробованя пеницилина, а Норман Гитли вынайшов технологию промысловой продукции.
• Александер Флеминг, Говард Флори и Ернст Борис Чейн в року 1945 довъедна трьоме были вызнаменаны як Нобеловы лавреаты з физиологии и медицины, понеже регула награды дозвалять максимално трьох участникох.

Жерела и одказы

• Brown, Kevin (2 Aug. 2021). Alexander Fleming. Encyclopedia Britannica. https://www.britannica.com/biography/Alexander-Fleming. [перевірено 2021-08-03]. англ.Прохоров А. М.
• ФЛЕМИНГ. //Большая российская энциклопедия; Том 33 — Москва, 2017, стр. 427. 2017. https://old.bigenc.ru/biology/text/4715441. [перевірено 03.08.2021].русс.
• Прохоров А. М. (гл. ред.). Большой энциклопедический словарь. Москва: Советская энциклопедия, 1993. 1630 с. ISBN 5-85270-015-0.C. 1421 русс.