Алмукантарат

Алмукантарат — то малый круг небесной сферы, ровина котрого паралелна ровинѣ математичного горизонта.^[1][2] Кедь два небесны объекты суть на том истом алмукантаратѣ, они мають еднаку углову высоту над горизонтом.^[3][4]

На небесной сферѣ алмукантарат означеный червенов, горизонт зеленов, а видимый путь звѣзд и Сонця — синьов

Етимология

Термин быв заведеный до астрономии монахом-звѣздарьом Германом з Райхенау, в латинизованой формѣ од ар. al-muqanṭarah ="сонѣчна годинка", множина: al-muqanṭarāt, што походить од qanṭarah ="облук, мост".^[5]

Практичне выужитя

Центры вшиткых алмукантаратох лежать на простой линии, котра споюе позицию позорователя и точку зенита.^[4] Тото давать можность путьом регистрации переходжѣня звѣзд через истый алмукантарат выраховати координаты позорователя на Землѣ.^[2]

Интересны факты

Алмукантар

Пристрой под назвов алмукантар вынайшов америцкый астроном Сет Карло Чандлер (1846–1913).^[6] Путьом позорованя за часом переходжѣня звѣзд через фиксованый алмукантар мож точно вызначовати геграфичну широкость и мѣстный час пункта позорованя.^[3][4] З помочов точного мѣряня Чандлер зробив свое найвекше объявлѣня, же географична широкость ся мѣнять з периодом 433 днѣ з одхылков 0,3″ (Чандлерова осцилация, англ. Chandler wobble).^[6]

См. тыж

• Малый круг
• Небесна сфера

Жерела и одказы

• Ottův slovník naučný. Illustrovaná encyklopaedie obecných vědomostí. Díl 1 Vyd. J. Otto. V Praze, 1888.
• АЛЬМУКАНТАРАТ //Большая российская энциклопедия. Том 1. Москва, 2005, стр. 560 Верзия: 2016. Одчитане: 22.04.2021
• Almucantar (по англицкы). Encyclopedia Britannica. 20 Jul. 1998. https://www.britannica.com/science/almucantar. [перевірено 2021-04-22].
• Seth Carlo Chandler (по англицкы). Encyclopedia Britannica. 27 Dec. 2020. https://www.britannica.com/biography/Seth-Carlo-Chandler. [перевірено 2021-04-22].
• Глоссарий (по русскы). astronet.ru. http://www.astronet.ru/db/glossary/. [перевірено 2021-04-21].