Верх Кременець

49°05′19″N 22°34′05″E

Кременець Kremenec, Krzemieneiec
Погляд од словацкого боку
49°05′19″N 22°34′05″E
Надморска вышка	1221 м
Перепад высот	565, 811, 815 м од выходиска
Умѣстнѣня	Польща, Словакия, Украина
Горске пасмо	Буковскы верхы
Легше выходиско	Ustrzyki Górne, Nová Sedlica, Стужиця

Верх Кременець (польск. Krzemieniec , слов. Kremenec) — еден из высшых верхов пасма Буковскы Верхы. За добы Чехословацкой републикы хосновала ся стара мадярска назва верха — Kremenáros. Высота горы 1221 м (подля иншых — 1216 м).

Умѣщѣня

Кременець — найвосточнѣйша точка Словакии. На верху Кременець сходять ся державны границѣ Польщи, Словакии и Украины. Юго-восточны схылы горы суть на территории Украины (в Ужанском националном природном парку), сѣверны схылы — на территории Польщи (в природном парку Бещады), юго-западны — Словакии (в народном парку Полонины). Фактично сам знак, умѣщеный в найвысшой точцѣ верха, находить ся уже 150 м дале за словацков границев.

История

В минулости быв то беззначный верх, и назва му была Руный верх (в мѣстном выгваряню значить ровный), прото, же як недалека Полонина Руна мать плоску вершину, подобну на невеличку полонинку. В серединѣ 19 стороча были урядно вызначены точны жупны границѣ, на верху быв поставеный геодезичный знак и достав верх назву Kremeny – Orosz, што в мадярчинѣ значить Руськый Кремень од Русинов (Руськых), якы ту жиють доокола. Доднесь мѣстны люде называють верх Кременарошом. Од року 1918 ту ся стыкають границѣ Словакии, Подкарпатской Руси и Польщи, од року 1939 — Мадярского кралевства и Нѣмецкого Райха, од року 1945 — Чехословакии, Польщи и Совѣтского Союза, од року 1991 — Словакии, Польщи и Украины.

Значкованы трасы

Туристичны значкованы трасы ведуть

• на словацком боку од Новоселицѣ — бѣло-червено-бѣла, 3—3,5 годины ходу, перепад 811 м.^[1]
• на польском боку од Устржиков Горных — бѣло-небово-бѣла, 2,5–3 годины ходу, перепад 565 м. ^[2]
• на украинском боку од Стужицѣ — бѣло-червена, час непознатый, перепад 815 м, на путь потребный дозвол вступу до пограничного пасма Украины.

Русинска стрѣча на Кременци

Од року 2008 на верху Кременець, де ся сходять готарѣ историчных карпаторуськых регионов Пряшовской Руси, Лемковины и Подкарпатской Руси влѣтѣ в наперед оглашеный день стрѣчають ся молодежны русинскы делегации туристов зо Словакии, Польщи и Украины. Тым манифестують едноту свого народа и надѣю на сполочну геополитичну будучность. Русины з Украины указують на факт, же Украина хоче быти членом Европской унии, де Русины суть узнаны як самостатна народность.^[3]