Владимир Бильня

Владимир Бильня, *25. фебруар 1927, Вербас, Мадярске кральовство (теперь Сербия) – †5. юн 2006, Новый Сад, Сербия — писатель, историк меджи войводинскыма Руснаками.^[1]

Владимир Бильня
Уроджѣня	фебруара 25., 1927(1927-02-25) Вербас
Умертя	юна 5., 2006 (79 р.) Новый Сад
Занятя	писатель, историк
Язык творох	руськый
Горожанство	Сербия
Час творбы	1968 – 1990
Жанры	повѣданя, роман
ЕСУ:41815; Ту можуть быти податкы з Wikidata, не контролованы авторами статѣ

Биография

Походив з худобной родины ремеселника. В рокы Другой свѣтовой войны быв участником народно-ослободителного боя против нацистичной Германии.^[2][3][1]

Быв офицером Югославского Народного Войска, закончив Высшу интендантску академию в Ленинградѣ (1948). В роках 1950 – 1955 быв репресованый.^[4]

В роках 1967 – 1988 працовав яко складатель и график в печатни выдавательства «Дневник» в Новом Садѣ.^[1]

Литературна творба

До литературы вступив в року 1968, коли в додатку Литературне слово новинка Руске слово напечатала его перве повѣданя Бачи Михал з брега. Далшы его повѣданя, переважно на военны темы, появляли ся в часописѣ Шветлосц, в рочнику Народни календар ай иншых периодиках.^[2]

Перва зберька его повѣдань Днї и ноци (1972) достала награду в конкурзѣ ку 30-рочу повстаня народох Югославии. Повѣданя зберькы споены еднов сюжетнов линиов о войновой дорозѣ военской единкы, што бойовала против Нѣмцьох. Многое в Бильньовой прозѣ звязано з недавньов историов его отчины, котру зажив; ту-там росповѣдь переходить до мемоарной публицистикы. В таком духу написаный и его первый роман Аз єсм (1990). Бильня тыж автор историко-публицистичной книгы о Руснаках Войводины, написаной по сербско-хорватскы Rusini u Vojvodini: prilog izučavanju istorije Rusina Vojvodine (1918 – 1945) (1987). Его русинскы книгы выданы тыж в сербско-хорватском, украинском, словацком ай иншых языках.^[2]

Библиография

• Днї и ноци. Циклус приповедкох. — Нови Сад: Руске слово, 1972. — 163 с.;
• V. Biljnja. Rusini u Vojvodini. Prilog izučavanju istorije Rusina Vojvodine (1918–1945). — Novi Sad: Dnevnik, 1987. — 191 s.
• Аз єсм. Роман. — Нови Сад: Руске слово, 1990. — 207 с.;
• Крижни драги. Антолоґия прози Руснацох и Українцох Югославиї. — Нови Сад: Руске слово, 1990, с. 279–306;

Жерела и одказы

• Aleksandr D. Dulichenko (2005). Bil'nia, Vladimir. in Paul Robert Magocsi, Ivan Pop. //Encyclopedia of Rusyn History and Culture (Revised and expanded ed.). Toronto Buffalo London: University of Toronto Press, 2005. p. 40. doi:10.3138/9781442674431. ISBN 0-8020-3566-3.англ.
• А. З.. 25. 2. 2022: Недожытых 95 років белетрісты і публіцісты – ВЛАДИМІРА БІЛЬНЇ. http://www.cms3.rusynacademy.sk/?25-2-2022-Недожытых-95-років-белетрісты-і-публіцісты-–-ВЛАДИМІРА-БІЛЬНЇ. [перевірено 2022-03-11].
• Дуличенко А. Д. (1997). Бильня, Владимир. // Русины. Малая энциклопедия. https://rdsa.tripod.com/pisatrusij.htm#bilna. [перевірено 2022-03-11].русс.
• Мишанич О. В.. Бильня Володимир. // Енциклопедія Сучасної України: електронна версія [онлайн] / гол. редкол.: І. М. Дзюба, А. І. Жуковський, М. Г. Железняк та ін.; НАН України, НТШ. Київ: Інститут енциклопедичних досліджень НАН України, 2003. https://esu.com.ua/search_articles.php?id=41815. [перевірено 11.03.2022].укр.