Владимир Святославич

Влади́мир Святосла́вич, споминаный тыж як Владимир Красное Сонѣчко, Владимир Святый, покрещеный як Василий; *cca 956^[1][2] – †15. юл 1015 — князь новгородскый (969–978), великый князь киевскый (978–1015), креститель Руси.^[1][3][4]

Владимир Святославич
Великый князь Киевскый
Панованя	979 – 15. юл 1015
Предходник	Ярополк Святославич
Наступник	Святополк Владимирович
Князь Новгородскый
Панованя	970 – cca 988
Предходник	Святослав Игоревич
Наступник	Вышеслав Владимирович
Уроджѣня	cca 956[1][2]
Смерть	15. юл 1015 (cca 59 рокы)
Дом	Руриковичѣ
Отець	Святослав Игоревич
Мати	Малуша
Конфесия	православие
Реверс стрѣберника Владимира Святославича

Владимир Святославич в Парку Кливленда, Огайо, скулптор Александер Архипенко

Походжѣня и приход до влады

Быв немалженскый сын князя Святослава Игоревича и Малушы, шафарькы княгынѣ Олгы. Его отець перед тым, як ся пустити до своей послѣдной войны, посадив свого немалженского, ещи малого сына Владимира в Новгородѣ Великому, куды з ним пошов пановати уйко Добрыня, старшого сына, Ярополка, посадив в Киевѣ, молодшого Олега — в Овручи, центрѣ Древлянской землѣ (969). По смерти Святослава Игоревича (972) меджи сынами настало суперѣня. Ярослав забив Олега в Овручи (977), а на то Владимир «убоявши ся утѣк за море» до Шкандинавии. Там набрав дружину з варягох, вернув ся до Новгорода, выгнав намѣстника Ярополкового и выголосив братови войну. Спочатку забив союзника Ярополкового, полоцкого князя Рогволода и силов оженив ся з його дѣвков Рогнедов. Пак пораховавши ся з Ярополком, котрого забили варягы, Владимир Святославич вокняжився в Киевѣ (978), ставши единовладным пановником Руси.^[3][4]

Державотворець и креститель Руси

В наступных роках покорив Вятичох, Радимичох, бойовав з иншыма сосѣдами. По часѣ через административну реформу замѣнивши у центрах основных рускых земель племенных вождьох, котры там все усиловали ся ку автономии, намѣстниками — своима сынами и довѣреныма боярами, забеспечив териториалну едность державы. Реформовав законодарство. При Владимирѣ Святославичу Русь вступила в добу своего процвѣтаня и меджинародного признаня. В зачатку панованя быв поганом. На змѣну многочисленым култам славянскых и неславянскых божеств росказав завести пантеон з шѣстьох богох зоз громовержцьом Перуном на челѣ. Авшак поганство не гарантовало поддержку держной владѣ, зато, зваживши интересы державы, од половкы 980-х зачав ся схыляти ку християнству, служителѣ якого были вѣрныма слугами владцьох, аж наконець, в року 988 прияв христианство. По принятю христианства як штатной религии оженив ся зоз сестров византского императора Аннов. Мав 12 сынох. В России приято поважовати го за ровноапостола.^[3][4]

День памяти Владимира Святого — 15 юл.^[1]

Жерела и одказы

• Vladimir I. Encyclopedia Britannica. 11 Jul. 2021. https://www.britannica.com/biography/Vladimir-I. [перевірено 2022-07-13].англ.
• Котляр М. Ф.. Володимир Святославич Святий. // Енциклопедія історії України : у 10 т. / Смолій В. и др. (ред.). Інститут історії України НАНУ.. Київ: Наук. думка, 2003. Том 1, сс. 619–620. ISBN 978-966-00-0734-5. http://www.history.org.ua/?termin=Volodymyr_Sv.укр.
• Орлов А. С., Георгиева Н. Г., Георгиев В. А.. Владимир I Святославович. // Исторический словарь — 2-е изд.. Москва: Проспект, 2015. с. 85. ISBN 978-5-392-18086-8.русс.