Кабардино-Балкарія

Кабардино-Балкарія, або Кабардино-Балкарська Республіка, — субєкт Российской Федероції, республіка у єй составі. Входить у Сїверо-Кавказькый федералный округ.

Головне містом — город Налчік.

Державны языкы суть: кабардино-черкеськый, карачаєво-балкарськый и руськый.

Граничить з Карачаєво-Черкесійов (на западі), зо Ставропольскым крайом (на сїверї), з Республіков Сїверна Осетія-Аланія и з Ґрузійов (на юзі).

Была заснована 1 септембра 1921 року як Кабардинська автономна область. Од 1992 року носить названя Кабардино-Балкарська Республіка.

Ґеоґрафія

Кабардино-Балкарська республіка є розташована у централній части сїверного макросклона Кавказу. Терїторія республікы є подїлена на три основны ґеоморфолоґічны зоны — гірську, предгірську и равнинну. Гірська и предгірна зоны занимають векшу частку терїторії. Равнинна зона обгортає сїверо-выходну частку республікы.

Через терїторію республікы паралелно єдно од другого ся простерають 5 основных хребтів Великого Кавказу: Пастбіщный (або Крїдовый), Лїсистый, Скалистый, Боковый и Головный (або Вододїлный).

Найвысша точка: гора Ельбрус (5642 метрів, западна верьшина) — є найвысша точка Росії, Кавказу и Европы. Через западну верьшину Ельбруса проходить адмініштратівна граніця Кабардино-Балкарії и Карачаєво-Черкесії, при тім выходна верьшина горы (5621 метрів), як и векша частка склонів, є у межах КБР.

Максімална довгость із сївера на юг: 167 кілометрів. Максімална довгость із выхода на запад: 123 кілометрів.

Історія

До сотворїня днешнёй республікы, на єй терїторії были розміщены дві історічны области — Кабарда и Балкарія. Кабарда ся складала з двох князівств: Велика Кабарда и Мала Кабарда, и занимала равнинну и предгірну частку днешнёй республікы. Балкарія, котра была подїлена на пять гірськых общин, занимала головнї гірськы и высокогірны раёны.

У 1921 роцї Кабарда и Балкарія разом з другыма областями Централного Кавказу вступили у состав Горськой АССР. 1 септембра 1921 року Кабардиньскый округ вышов із составу Горськой автономной республікы, a пак 16 януара 1922 року за ним пішла и Балкарія.

Кабардино-Балкарська автономна область была сотворена у 1922 роцї, у 1936 роцї преобразована у АССР.

У роках Другой світовой войны у Кабардино-Балкарії была сформована 115-а Кабардино-Балкарська кавалерійська дівізія, котра ся била у Битві за Кавказ и Сталінґрадьскій битві. У 1942 роцї векша частка республікы была окупована. 11 януара 1943 року Кабардино-Балкарія была повном ослободжена. У 1944 роцї у зв'язку з выселеням балкарців была перейменована у Кабардиньску АССР, од 1957 року — зато Кабардино-Балкарська АССР. Од 1992 року — Кабардино-Балкарська Республіка.

У 1950-х и 1960-х роках были поставлены великы промисловы підприємства.