Катар

Ката́р (ар. قطر Qatar), официално Штат Ката́ра (ар. دولة قطر Dawlat Qaṭar, англ. The State of Qatar) — монархия в югозападной Азии, на полуостровѣ Катар.^[2] Главным городом е Довга.

Катар араб. دولة قطر
Застава и герб 25°30′N 51°15′E
Розлога	11586 км2
Обывательство	над 3 милионы (2025) [1]
Столиця	Доуга
ГДП на особу	$129360
Интернет-домен	.qa
Часова зона	UTC+3
Телефонный код	+974
***

Обывательство и штатне заряджѣня

Держава зо скоро наростаючым обывательством: днесь (2025) десять разы тельо, як было в року 1986 (300 тыс.),^[2] але корѣнне обывательство чинить лем ¼, а ¾ суть имигранты, поза городами жие менше як 10% обывательства.

Официалный язык — арабскый. Державна религия — ислам. Державне заряджѣня — абсолутна монархия. Глава державы — емир.^[2]

География

Низинна пустыня, ровнина. Клима тропична, суха. Середня теплота януара 16°С, юла — 32°С. Атмосферичны падавины до 125 мм рочно. Рѣкы не суть, аграрна продукция лем в оазах.^[2]

История

Од VII. стороча в Арабском халифатѣ. В XIII. – XIV. сторочах под владов емирох Бахрейна; в зачатку XVI. стороча — Португалцьох, затым — Османской империи. В роках 1916–1971 под британскым протекторатом.^[2]

По безкровном державном переворотѣ в року 1995 (сын одстранив од влады отця) зачали ся радикалны реформы. Створена сателитна новинова агенция Al-Jazeera и Катар зачав доставати векшу вагу в рѣшѣню регионалных конфликтох. В року 2007 Катар досяг найвысшый во свѣтѣ ГДП на особу.^[3]

Доналд Трамп з визитом до емира Катара Тамим бин Хамад Ал Тани (2025)

Политика

По регионалных непокоях в року 2011 Катар хвалив ся свойов подпоров многых регионалных «револуций», наймя в Либии и Сирии. Тов политиков погубив одношѣня з Бахрейном, Египтом, Саудсков Арабиов, Споеныма Арабскыма Емиратами. По куртом примирѣню (2014), в року 2017 тоты державы розорвали з Катаром дипломатичны и економичны одношѣня.^[3] Од року 2022 Катар главный союзник США поза рамками НАТО.^[4]

Економика

Економика основана на експортѣ сырой ропы и земного газа. При днешном темпѣ експорта ропы застане на дас 56 рокы. Резервы земного газа чинять 13% од свѣтовых.^[3]

Жерела и одказы

• Прохоров А. М. (гл. ред.): Большой энциклопедический словарь — Москва: Советская энциклопедия, 1993. — 1630 с. ISBN 5-85270-015-0 русс.
• Qatar. CIA World Factbook. https://www.cia.gov/the-world-factbook/countries/qatar/. [перевірено 2021-04-10].англ.