Композиция (вытварництво)

Композиция во вытварництвѣ е способ, якым елементы образа (колоры, формы,свѣтла и тѣнѣ) або пластичного дѣла (формы, масы, материалы) розмѣщены еден односно другого в образѣ, графицѣ, фотографии або скулптурѣ, жебы творили они гармоничну цѣлость.

Ян Вермер: Умѣня мальованя

Установити точны правила про композицию не е можности, бо они зависять од нашых представ о прекрасном, котры зовсѣм односны и мѣняють ся зависимо од добы, мѣста, народности, и принятых в сполоченствѣ пересвѣдчень и смакох.^[1]

Композиция — цѣла наука, маюча серьезны теоретичны роботы, але про зачаток доста знати же суть найважнѣйшы принципы, котры все будуть потребны и хосенны в практичной роботѣ. Додержаня тых принципох позитивно вплыне на естетичны якости вытварного дѣла.^[2]

Центер композиции

Композиция мусить мати предмет, притягуючый ку собѣ векшу позорность реципиента — тот елемент композиции е композичным центром. Композиция може мати даколько предметох, але в доброй композиции акцентованый лем един з них.^[2]

Нич надбыточне, вшитко потребне

В образѣ не смѣе быти нич надбыточне, што бы непотребно одтяговало позорность од композичного центра. Але з другого боку мають быти вшиткы подробности, котры потребны, жебы реципиент розумѣв замысел автора.^[1]

Правило третин

Композичный центер не смѣе быти в геометричном центрѣ образа. Поважуе ся, же найлѣпша позиция композичного центра одстоить на третину ширины образа од правого або лѣвого края и на третину вышкы од верха або спода.^[2]

Линия споеня

Кедь в образѣ суть первый, другый и третий планы, добрѣ, жебы была линия споеня, котра переведе око реципиента од первого на другый и третий план.^[2]

Жерела и одказы

• Сомов А.И.: Композиция. //Энциклопедический словарь Брокгауза и Ефрона, т. XVa (1895): Коала — Конкордия, с. 907.
• Майкл Сендерс: Основы композиции.