Коньска сила

Коньска сила — застарѣла несистемна мѣра выкону, котра в державах з метричнов системов мѣр ровна ≈736 Вт, а в англоязычных ≈746 Вт. Перву называють метрична коньска сила, а другу — империална, британска або механична:^[1]

Метрична = 0,9863 империалной.

Объяснѣня метричной коньской силы (metric horsepower, hp). Една коньска сила — выкон, котрый потребный, жебы подняти 75 kg (середня вага особы) на 1 m (3.28 feet) за 1 s часу. Метрична коньска сила еквивалентна приблизно 735.5 W.

Коньска сила продовжать ся поуживати в тракторовом и автопромыслѣ и позначать ся PS (Pferdestärke, по нѣмецкы), CV (cheval-vapeur, по французскы), HP або hp (horsepower, по англицкы).^[2]

Авторство

Термин «коньска сила» придумав Джеймс Ватт. В той добѣ тяжку роботу пумпованя воды, двиганя терьху и подобны в промыслѣ, баництвѣ робили з коньми. Ватт, котрый зробив значны вылѣпшѣня в своем парном моторѣ, потребовав доступно пересвѣдчити газдох, кельо коней им може замѣнити его дорогый мотор.^[3]

Кельо «кони» мать конь?

Пошыренов е хыбна концепция, же конь мать едну коньску силу (а значить, кедь авто номинално мать 75 hp — та гибы тягне як 75 коней довъедна. Не е то так. Максималный выкон коня може быти аж 15 hp, а чоловѣка — кус веце як 1 hp. Найлѣпшы шпортовцѣ Tour de France можуть тримати выкон 1,2 hp в интервалѣ 15 s, а выкон 0,9 hp в интервалѣ едной минуты.^[3]

Джеймс Ватт не манипуловав з правдов. Означив коньску силу, выходячи з роботы коня, запряженого до конного млина, за цѣлу шихту, подѣливши на ей довжку в минутах и достав 32 572 фонто-стоп за минуту и закруглив на 33 000 фонто-стоп за минуту. Означѣня метричной коньской силы як 75 кг-м за секунду при перерахунку давать 32 549 фонто-стоп за минуту.^[1][4]

Е правдов, же максималный выкон коня 15 hp, але середний за цѣлу шихту якраз около 1 hp.^[3]

Интересны факты

Калкулуючи подобным способом выраховали середний выкон чоловѣка за цѣлый день и пришли на величину 100 W. Тота «людска сила» достала назву енергетичный слуга.^[3]

Жерела и одказы

• Horsepower (по англицкы). Encyclopaedia Britannica. https://www.britannica.com/science/horsepower. [перевірено 2019-06-17].
• Horsepower (по англицкы). Energy Education. https://energyeducation.ca/encyclopedia/Horsepower#cite_note-medlock-2. [перевірено 2019-06-17].
• Лошадиная сила (по русскы). Большая Советская Энциклопедия. http://bse.sci-lib.com/article071478.html. [перевірено 2019-05-20].