Кральовство Великой Британии

Тота статья пише о заниклой историчной державѣ. О днесь екзистуючой державѣ см. Споене кральовство.

Кральовство Великой Британии Kingdom of Great Britain ↓ 1707 – 1800 ↓ застава герб
География
Главный город	Лондон
Розлога	230 977 km²
Обывательство
Число	1707: 7 000 000 1800: 10 500 000
Языкы	English, Scots, Cymraeg, Scottish Gaelic
Державна организация
Форма влады	конштитучна монархия
Валута	либра штерлингох
Взник	1. май 1707
Заник	31. децембер 1800
Предходникы: Англицке кральовство Шкотске кральовство Наступникы: Споене кральовство Великой Британии и Ирландии

Кральовство Великой Британии, англ. Kingdom of Great Britain, официално тыж Велика Британия, англ. Great Britain^[1] — исторична держава, котра екзистовала в роках 1707–1800. Взникла злучѣньом Англицкого кральовства и Шкотского кральовства на основѣ законох о унии, приятых в первой половцѣ року 1707 одповѣдно англицкым и шкотскым парламентами.

Оба кральовства од року 1603, по смерти Елизабет І. ей наступець, шкотскый краль Якуб І., прияв под свою владу з титулом Краля англицкого и Краля шкотского, наслѣдком чого перебывали в персоналной унии, а в обох кральовствах фунговали самостатны парламенты. По злучѣню в року 1707 быв вытвореный еден парламент, котрый засѣдав в Лондонѣ.

В року 1800 быв приятый Акт о унии 1800,^[2] ратификованый парламентами обох сторон, котрый в §1 конштатовав, же дньом 1. януара 1801 Кральовство Великой Британии и Кральовство Ирске злучають ся навсе до едного кральовства, под назвов Споене кральовство Великой Британии и Ирландии. Тым актом заникла стара держава и взникла нова.

Етимология

Назва Britain походить з латинской назвы острова Велика Британия — Britannia або Brittānia, через старофранцузске Bretaigne (в модерной французчинѣ Bretagne) и середньоанглицке Bretayne, Breteyne. Назва Great Britain была первый раз официално поужита в року 1474.^[3]

В Договорѣ о унии з рока 1706, §1, пак в наступном ратификачном Актѣ о унии (1706) зафиксовано, же оба кральовства, од датума ту зазначеного, циже 1. мая 1707, и навсе злучують ся до едного кральовства, под назвов Велика Британия.^[1]

Монархы

Стюартовцѣ

• Анна, англ. Anne, (1707–1714) (в рр. 1702-1707 Кральовна Англии, Шкоции и Ирландии)

Ганноверцѣ

• Георг І., англ. George I (1714–1727)
• Георг ІІ., англ. George II (1727–1760)
• Георг ІІІ., англ. George III (1760–1800) (продовжив яко Краль Споеного кральовства до своей смерти в року 1820)

Жерела и одказы

• Denys Hay. Europe: the emergence of an idea. Edinburgh U.P., 1968; p. 138.
• Act of Union 1800 англ.