Луксембурчане

Луксембурчане, лукс. Lëtzebuerger, суть германска етнична група, обываюча Велике герцогство Луксембург, меншы групы Луксембурчанох жиють во Франции, Белгии^[7] и ФРГ,^[8] а тыж в розсѣяню по свѣтѣ.

Луксембурчане
лукс. Lëtzebuerger

Габриел Липпманн • Пол Лотербур • Жул Гоффманн Роберт Шуман • Жан-Клод Юнкер • Анди Шлек
Популация
По цѣлом свѣтѣ 470 200[1]
Регионы зо значнов популациов
Луксембург 382 000 [1] Франция 45 000 [1] США 40 658 [2][3] Белгия 30 000 [1] Аргентина 25 000 – 80 000 [4] Германия 15 596 [5] Канада 3 790 [6]
Языкы
луксембургскый, французскый, нѣмецкый
Религия
Христианство (переважно римокатоликы)
Близкы етничны групы
Нѣмцѣ, Французы, Белгичане

История

Луксембурчане в минулости были поважованы за нѣмецкый субетникум, а луксембургскый язык — за диалект нѣмецкого языка. Их територия, положена в самой серединѣ западной Европы, была предметом интереса силнѣйшых сосѣдох, в резултатѣ войн велику часть зоз своей територии утратили. Але на позосталой територии в року 1876 была выголошена «вѣчна независимость и невтралный статус» Луксембурга.

В самом зачатку Другой свѣтовой войны Луксембург потвердив свою невтралность и выдав о том официалне выголошѣня 6. септембра 1939.^[9] Наперек тому 10. мая 1940 Гитлер послав три панцеровы дивизионы и окуповав Луксембург. Луксембурчане были выголошены за Нѣмцьох, мобилизованы до войска, французскый язык быв заказаный. Луксембурчане одповѣли пасивным одпором и навернѣньом ку свому мѣстному диалекту. На мобилизацию до нѣмецкого войска одповѣли генералным штрайком. Понад пять тысяч Луксембурчан упали жертвами нѣмецкых репресий. Тоты подѣи змоцнили самосвѣдомость народа, згорнуту в народне мотто Mir wëlle bleiwe wat mir sinn (Хочеме зостати тыми, кыми есьме).

Днешность

Од року 1984 луксембургскый язык достав статус самостатного языка и урядного языка Луксембурга. Луксембурчане бесѣдують на луксембургском языцѣ, другыма урядныма языками суть французскый и нѣмецкый языкы. Вѣрникы — переважно католикы, невелика часть — протестанты. Подля походжѣня Луксембурчане суть близкы ку Нѣмцям, але исторично ся одокремили од них. Материална, а во великой мѣрѣ и духовна култура Луксембурчан мало чим одличуе ся от културы обывательох сосѣдных регионох Франции и Белгии.^[7]

Жерела и одказы

• Люксембуржцы. //Украинский советский энциклопедический словарь в трех томах. / Кудрицкий А.В. и др. (ред.). Главная редакция Украинской Советской Энциклопедии им. М.П. Бажана. К., 1988. Том 2. ISBN 5-88500-002-6. С. 303.
• Люксембуржцы. //Большая Советская Энциклопедия.