Йосиф Сталин

Йо́сиф Висарио́нович Ста́лин (правдиве призвиско Джугашви́ли, груз. იოსებ ბესარიონის ძე ჯუღაშვილი (Ioseb Besarionis dze Jughashvili), русс.   Иосиф Виссарионович Сталин (файл); (18. децембер 1878 – †5. марец 1953) — грузинского походжѣня, комунистичный политик и револуционарь, котрый быв лидером Совѣтского Союза од року 1922 до своей смерти в року 1953. Быв наступником Владимира Ленина на посту лидера Совѣтского Союза. Прибране призвиско Сталин, в роках 1912–1917 его коншпиративна прозывка, означовало хлоп з оцѣли (од оцѣль — русс. сталь); тоту прозывку му выбрав Ленин, а перед тым мав грузинску прозывку Коба (по русинскы: оцѣненый, прияв ей замолода).^[1]

Йосиф Висарионович Сталин
Генералный секретарь ЦК КПСС, 1942
Генералный секретарь ЦК КПСС
Во функции:
3. апрѣль 1922 — 16. октобер 1952
Предходник	Вячеслав Молотов
Наступник	Никита Хрущов
Предсѣдатель Рады Министрох СССР
Во функции:
15. марец 1946 — 5. марец 1953
Наступник	Георгий Маленков
Уродив ся	децембра 18., 1878(1878-12-18)
Умер	марца 5., 1953 (74 р.)

Сталин на конференции в Тегеранѣ, 1943

Сталин и Мао, два комунистичны лидры

Его идеи и политика перетворили Совѣтскый Союз на могучу, односно модерну державу, найвекшу на Земли. Его способ думаня быв называный марксизмом-ленинизмом, а его форма державной влады нескорше была названа сталинизмом. В той добѣ в державѣ ся дѣяв безпрецедентный в истории людства взлет многых милионох люди зоз самого споду сполоченства на майстрох, инженерох, учительох, дохторох, артистох, офицерох, ученых, писательох, директорох и подобне. И тоты милионы, прилучаючы ку своим взлетам далшы милионы, были опоров и ударнов силов сталинизма. А Сталин в свѣдомости такых люди быв символом того великого процеса. Народ обманутый не быв. В наймасовѣйшых репресиях сталинской добы, в котрых потерпѣли милионы простых люди, брали активну участь милионы другых простых люди, а часто были они и в роли ката, и в роли жертвы. Тоты репресии тыж были проявом творивости широкых мас обывательства. Гроза епохы сталинизма была в тому, же она вытворила тип чоловѣка, готового ити на жертвы и зробити своима жертвами другых люди.^[2]

Видячи назрѣваючу свѣтову войну, Сталин прискорив индустриализацию державы и насилну колективизацию земледѣлства. В конци 1920-х и в 1930-ы рокы Сталин вынищив реалных и гаданых соперникох, што достало форму громадного терора. Од конця 1930-х тримав вонкашный курз на змягчѣня конфликтох з нацистичнов Германиов, але тота политика не захранила совѣтскый народ од трагедии нѣмецко-совѣтской войны. По тому, як Германия ся вломила до Совѣтского Союза, Сталин стояв на челѣ кровавой войны, выгравши котру достав под контролу цѣлу Выходну Европу и часть Германии. Там были створены лоялны Совѣтскому Союзу марксистично-ленинскы еднопартийны штаты, што змоцнило великодержавный статус Совѣтского Союза. По смерти Сталина, на 20-м конгресѣ КПСС (1956), Н. С. Хрущов поддав острой критицѣ так званый култ особы Сталина.^[3]

Сталин — контроверзна исторична постава. Многы историци видять го яко крутого диктатора, але иншы му дають честь яко творцю Совѣтского Союза.^[4][3] Сучасны социологичны анкеты в России (2008) указали го яко третю найпопуларнѣйшу фигуру российской истории.^[5] В рокох 2006–2008 социологичны анкеты указали, же без малого половка доспѣлого обывательства России поважуе Сталина за позитивну историчну фигуру.^[6][7]

Жерела и одказы

• Гусляров Е. Н.. Сталин в жизни : систематизированный свод воспоминаний современников, документов эпохи, версий историков — Олма-Пресс Звездный мир, 2003. — 749 с. — (Биографические хроники). — ISBN 9785948500348. рос.
• Гусляров Евгений. Сталин в жизни. Москва: ОЛМА-ПРЕСС Звездный мир. https://www.rulit.me/author/guslyarov-evgenij/stalin-v-zhizni-download-77268.html. [перевірено 2022-03-29].русс. Ту доступный повный текст книгы, але без пагинации.
• Александр Зиновьев. О Сталине и сталинизме. //Евгений Гусляров: Сталин в жизни : систематизированный свод воспоминаний современников, документов эпохи, версий историков. Биографические хроники. Москва: ОЛМА-ПРЕСС Звездный мир, 2003. Сс. 3–8. ISBN 5-94850-034-9.русс.
• Вячеслав Румянцев, ред.. Иосиф Виссарионович Сталин (Джугашвили). ХРОНОС: ВСЕМИРНАЯ ИСТОРИЯ В ИНТЕРНЕТЕ. http://www.hrono.ru/biograf/bio_s/stalin_iv.php. [перевірено 2022-03-30].русс.