Поддуклянскый умѣлецкый людовый сполок

Поддуклянскый умѣлецкый людовый сполок (ПУЛС), словац. Poddukelský umelecký ľudový súbor (PUĽS) — професионалный умѣлецкый збор в Словакии, створеный 5. децембра 1955 выокремлѣньом з колектива «Українського національного театра», дружства з обмеженов гаранциев в Пряшовѣ. ПУЛС е юридично справованым и дотованым Пряшовскым самосправным крайом.^[1]

Поддуклянскый умѣлецкый людовый сполок (ПУЛС) Poddukelský umelecký ľudový súbor (PUĽS)
Взник	децембра 5., 1955 (1955-12-05) (69 р.)
Тип	фолклорный ансамбель
Замѣр	сценична презентация русинского танця и спѣву
Сѣдлиско	Námestie legionárov 6 081 61 Prešov
Штат	Словакия
Урядный язык	русинскый, словацкый
Ведучый	Юрай Швантнер
Працовникох	понад 40
Официалный сайт	словац.

Умѣня

Взниклый в року 1955 з цѣльом ширити и сценично презентовати вокално-музичне и танечне богатство Русинох и Украинцьох, колектив з понад 40 умѣлцьох складать ся зоз трьох части — танечной, спѣвацкой и музичной. Драматургия ПУЛСу ся ориентуе в первом рядѣ на традиции Русинох, жыючих на выходѣ Словакии, але так само на фолклор остатных регионох штату, котры ся колектив намагать перекомпоновати до высшой сценичной подобы. Во свойом репертоарѣ мать ПУЛС ай танцѣ з околичных штатох. ПУЛС е уникатным тѣлесом, што мож видѣти на його представлѣнях, в котрых ся указуе сила гордого натурелу, споена зоз выбрушеным чутьом про поетику. Концерты ПУЛСу суть повны емоций, идейно богаты, их навщивник ся годен не лем одреаговати, але тыж начерпати множество позитивной енергии. Днешный ПУЛС е амбициозный колектив зоз смѣлыма драматургичныма планами, котры хоче и в будучности наповнити. Колектив ПУЛСу диспонуе властнов техников: професионалнов звуковов, освѣтлюючов апаратуров и властным транспортом.^[1]

История

За час його богатой истории ся в колективѣ ПУЛСу вычеряли веце як 500 професионалных умѣлцьох. Многы з них у свойой карьерѣ продовжовали в иншых колективах на Словакии, або и за ей границями. Бывшы пулсаци ведуть аматерскы колективы, або як педагогы присвячують свой час выховѣ молодой умѣлецкой генерации. Од свого выникнутя ПУЛС абсолвовав веце як дясять тысяч представлѣнь дома и десяткы выступлѣнь за границями свого штату. Апловдовала му публика в Англии, Болгарии, Дании, Франции, Голандии, Югославии, Канадѣ, Норвегии, Польщи, Австрии, Германии, Швайцу, Италии, Тунисѣ, США и в штатах бывшого СССР.^[1]

См. тыж

• Иван Мацинскый

Жерела и одказы

• Poddukelský umelecký ľudový súbor (PUĽS). Prešovský samosprávny kraj. http://puls-slovakia.sk/. [перевірено 2020-12-04].словац.