Протекторат Богемия и Моравия

Протекторат Богемия и Моравия (чеш. Protektorát Čechy a Morava, нѣм. Reichsprotektorat Böhmen und Mähren) — быв окупачным режимом, зрядженым на скресаных (подля Мюнхенской догварькы) чешскых землях, окупованых 15. марца 1939 нацистичнов нѣмецков армадов и фактично припоеных ку Третьому райху. Формално протекторат быв выголошеный 16. марца 1939 декретом о зряджѣню Протектората Богемия и Моравия.^[1]

Протекторат Богемия и Моравия Protektorát Čechy a Morava Reichsprotektorat Böhmen und Mähren ↓ 1939 – 1945 ↓ застава герб
Гимна: Kde domov můj?/Wo ist mein Heim
География
Главный город	Прага
Розлога	49 363 km²
Обывательство
Число	7 380 000 (1939)
Народностне зложѣня	Чехы, Нѣмцѣ
Языкы	чешскый, нѣмецкый
Набоженство	римокатолицке
Державна организация
Форма влады	автономия, протекторат
Материнскый штат	Нацистична Германия
Валута	протекторатна коруна
Взник	16. марец 1939 декрет о зряджѣню протектората
Заник	8. май 1945 капитулация Нацистичной Германии
Предходникы: Чехословакия Наступникы: Чехословакия

Адолф Гитлер 15. марца 1939 особнѣ прийшов до Прагы, увидѣти Пражскый град

Райнгард Гайдрих и держсекретарь Протектората К. Г. Франк на градѣ, 1941

Слуханя заграничного радия, або вылѣпшѣня апаратуры на тоту цѣль ся карало смертьов

Авто Гайдриха по атентату

Протекторат наступно быв прилученый ку мытной територии Райха, а не мав право на вонкашну политику: мав лем представителя при имперской владѣ, официално называного «амбасадор», але з прямым означѣньом, же без статуса члена дипломатичного збору.

Хроника ключовых подѣй

Основне жерело: Protektorát Čechy a Morava / DATA A FAKTA.

• 30. септембер 1938 — подписана Мюнхенска догварька, котра зачала процес росчленѣня Чехословакии; влада и президент резигновали.
• 30. новембер 1938 — по резигнации Едварда Бенеша 66-рочный правник Емил Гаха под напором свого окружѣня прияв функцию президента ЧСР.
• 14. марец 1939 — словацкый сойм выголосив независимость Словацкого штату.
• 15. марец 1939 — Карпатска Украина выголосила независимость од Чехословакии. Зачала ся окупация Чех и часточно Словакии нѣмецкым войском, а Карпатской Украины мадярскым войском.
• 16. марец 1939 — выголошеный Протекторат Богемия и Моравия.
• 18. марец 1939 — первым райхспротектором став ся Конштантин фон Нойрат.
• 28. септембер 1941 — первым дочасным протектором менованый Райнгард Гайдрих.
• 27. май 1942 — атентат на Р. Гайдриха (умер 4. юна).
• 4. юн 1942 — другым дочасным протектором менованый Курт Далюге.
• 3. юл 1942 — так звана Присяга народа коло памятника Св. Вацлаву в Празѣ: понад 200 тыс. особ склали присягу вѣрности Райху; пропагандна акция мала покласти конець одпору.
• 24. август 1943 — другым райхспротектором менованый Вилгелм Фрик (зостав до конця Протекторату).

Печать райхспротектора

Рух одпору

Одпор против окупации быв на зачатку неорганизованый и представляв из себе дробны саботажы або замѣрно неодповѣдну працу. В Словацком штатѣ было то иншак, понеже нововыголошена «независимость» цѣлком зависѣла од Третього райху; в далшых роках поступом того як ся горшила ситуация Райху, наростав одпор Словакох властному штату.^[2]

15. новембра 1939 погреб штудента Яна Оплетала, котрый быв раненый при насилном роспорошѣню демонстрации 28. октобра 1939 в Празѣ при нагодѣ рочницѣ Чехословакии, перерос в антигитлеровскый протест. За тото 17. новембра 1939 вшиткы высокы школы в протекторатѣ были закрыты на три рокы, 1200 штуденты высланы до концентрачного лагра, а девятеро активисты скараны смертьов.^[3]

Е. Бенеш, котрый ся з екзиловов владов осадов в Лондонѣ, выслав до Протекторату десяткы озброеных парашутистох, котры мали организовати локалны групы одпору и высылачками подавати до Лондону информации. Тоты десанты ишли практично на заручену смерть. По нападу на СССР Райх потребовав острѣйшого придушѣня одпору. Намѣсто Нойрата быв покладеный скушенѣйшый Гайдрих. Гайдрих нараз выголосив штатарию. Суды были лем военны, а россудкы были лем три: концентрачный лагер, смерть або помилованя. За первы тыжднѣ Гайдрихова урядованя до лагрох были посланы 2000 особ, а 500 скараны смертьов. Гайдрих завюг политику кербача и медовника. Добрѣ розумѣв, же Протекторат мать великый промысловый и зброярскый потенциал. Kтo ходив на роботу и не контактовав з одпором, то мав спокой. Штовеце, Гайдрих выразно подняв нормы застачаня, з чим вырос животный уровень. Але кто не хотѣв сполупрацовати, за тым пришло Гестапо. До яри 1942 удало ся одпор майже докус ликвидовати.^[2]

Гайдрих жив в каштелю под Прагов, а каждый день з автом ходив до Прагы. Так ся групѣ парашутистох, посланых Е. Бенешом з розказом забити го, удало ся го привартовати и поранити, од чого по пяти дньох умер. Окупанты на атентат одповѣли могутным терором. Символом той помсты стали ся села Лидице и Лежакы, котры были спалены, а их обывателе забиты.^[3]

Одпор, организованый з Лондона, приспѣв ку тому, же лондонска екзилова влада была вызнана за легитимну, а Емил Гаха за марионетку.^[2]

Интересны факты

• По атентату и смерти Гайдриха репресивны акции справовав Карл Германн Франк, котрый нараз дав росказ забити 10 000 Чехох. Але Гитлер тот росказ сам зрушив, понеже хотѣв мати в Протекторату спокой и плынну скору збройну выробу.^[2]
• Медсестра Мария Наварова, котра ся нагодов стала свѣдком атентату и за своев професийнов повинностьов надала раненому перву медицинску помоч, была в року 1948 засуджена на 8 рокы за колаборацию.^[3]

Жерела и одказы

• České dějiny/Domácí odboj & Protektorát. Kniha ve Wikiknihách. https://cs.wikibooks.org/wiki/České_dějiny/Domácí_odboj_%26_Protektorát. [перевірено 2021-07-22].чеш.
• Protektorát Čechy a Morava / DATA A FAKTA. Radio Prague International / Czech Radio. https://archiv.radio.cz/cz/static/protektorat/protektorat_data. [перевірено 2021-07-22].чеш.
• Мапа роздѣлу Чехословакии Германиев, Мадярщинов и Польщов концьом 1930-х мад.
• Трухачев В. В.. Мюнхенский сговор. Энциклопедия Всемирная история. https://w.histrf.ru/articles/article/show/miunkhienskii_sgovor. [перевірено 2021-07-21].русс.