Сен-Жерменскый мирный договор

Сен-Жерменскый мирный договор, подписаный 10. септембра 1919 в Сен-Жермен-ан-Ле (Saint-Germain-en-Laye; при Парижу) Австриев, з едной стороны, и державами побѣдницями в Первой свѣтовой войнѣ. Договор говорив о конци Австро-Мадярщины, заказовав аншлус, ограничовав збройны силы Австрии, и повиновав ю выплачовати репарации.^[1]

Суть другы вызнамы, см. Сен-Жерменскый договор (вызнамы).

Роспад Австро-Мадярщины

В договорѣ ся официално зафиксовав роспад Австро-Мадярщины и независимость новоствореных з ей територии держав. Договор прийшов на силу 16. юла 1920.^[2]

Парижскый мировый процес

Тому договорови в ходѣ мирового процеса предходив

• 28. юна 1919 договор з Нѣмецкым цѣсарством во Версаю,

а за ним наслѣдовали далшы договоры:

• 27. новембра 1919 з Болгариев в Нейи на Сенѣ;
• 4. юна 1920 з Мадярскым кральовством в Трианонѣ;
• 10. августа 1920 з Османсков империев в Севрѣ.

Утраты Австрийского цѣсарства

Териториалны утраты:

• на хосен нововзниклой Чехословакии — провинции Богемия, Моравия, австрийска Шлезия и часть Тѣшинского региона;
• на хосен Италии — провинции Южна Тиролия, Истрия;
• на хосен Румынского кральовства — провинция Буковина;
• на хосен Польщи — провинция Галичина;
• на хосен нововзниклого Кральовства Сербох, Хорватох и Словинцьох — часть провинций Штирия и Корутания.

Напротив, на хосен Австрии оддали часть западных мадярскых земель, котры назвали Бургеланд, але в року 1921 их часточно, з городом Шопрон вернули.

Австрии было заказано мати всеобщу войскову повинность, морскый и воздушный флоты, а сухоземске войско не могло быти над 30 тысяч особ.

В Австрии протестовали против игнорованя принципа самоопредѣлѣня народох, наслѣдком чого вельо етничных Нѣмцьох достали ся под чехословацку або италиянску владу. Австрия тым договором была финанчно и милитарно ослаблена и стала ся жерелом хроничной нестабилности в Европѣ меджи двома войнами.^[2]

Интересны факты

• По роспадѣ Австро-Мадярщины и абдикации цѣсаря Карла I. (11. новембер 1918)
  • нѣмецкы посланцѣ бывшого сполочного парламента выголосили ся за провизорный парламент Нѣмецкой Австрии, котра мала ся стати частьов Нѣмецкого цѣсарства;
  • законно выбраный канцлер Нѣмецкой Австрии Карл Реннер прибыв до Сен-Жермен-ан-Ле з переговорнов делегациев еще в маю, але не были они припущены ку догваряням, лем 10. септембра 1919, жебы могли подписати договор (могли вшак подавати писомны нарѣканя и поносы);
  • доконця им записали в «договорѣ», же их держава не смѣе ся называти Нѣмецков Австриев, ай не смѣе ся злучити з Нѣмецкым цѣсарством, ани его наступником, а они мусѣли тото подписати.
• Понеже договор дотыкав ся територий Австрии, там не говорить ся о словацкых и русинскых землях, котры належали ку Мадярскому кральовству, авшак з назвы нововзниклой державы, называной в договорѣ Czecho-Slovak State, выплывало, же Словаци будуть ей частьов, а о Русинах прямо упоминала Статья 53, котра говорила, же частьов Чехословакии буде «автономна територия Русинох на юг од Карпат».

Жерела и одказы

• Большой энциклопедический словарь. Главный редактор А. М. Прохоров — Москва: Советская энциклопедия, 1993. — 1630 с. ISBN 5-85270-015-0 рус.
• Treaty of Saint-Germain (по англицкы). Encyclopaedia Britannica. https://www.britannica.com/event/Treaty-of-Saint-Germain. [перевірено 2019-08-17].
• Текст договора по чешскы або англицкы