Середня Азія

Середня Азия, англ. Central Asia — централный регион Азии, простертый от Каспийского моря на западѣ до границѣ зоз западным Китаем на востоку. Тот регион межуе на сѣверѣ з Россиев, а на югу з Ираном, Афганистаном и Китаем.^[1]

Середня Азия, политична мапа, 2008

Границѣ Середней Азии:

  дефиниция СССР, без Казахстана

  днешня дефиниция додала Казахстан

  дефиниция UNESCO, найширша

«ЗАХРАНЬТЕ НЯ ОД ПРИЯТЕЛЬОХ!»

Политична карикатура з року 1878 указуе афганского емира Шер Али меджи двома его приятелями: Россиев и Британиев

Зложѣня

Регион загорнюе пять бывшых совѣтскых републик:

Штат	Главный город	Розлога (km²)	Обывательство
Казахстан	Астана	2 717 300	18 754 000
Кыргызстан	Бишкек	198 500	6 520 000
Таджикистан	Душанбе	143 100	6 880 000
Туркменистан	Ашхабад	488 100	5 040 000
Узбекистан	Ташкент	447 400	27 440 000

Спор о дефиниции и вплыв

В процесѣ формованя, од року 1925 по 1936, в СССР были створены четыре союзны републикы (Кыргызска ССР, Узбекска ССР, Таджикска ССР, Туркменска ССР), котры довъедна творили Середнеазийскый економичный район (называный тыж «републикы Середней Азии»). О Казахстан там не ишло, але кедь думали о вшиткых пятьох републиках, тогды означовали: «Казахстан и Середня Азия».

Од року 1990 заведено нове понятя — Централна Азия, котре все вецей хосноване в научной литературѣ и в каждоденном ужитю. В року 1992 президент Казахстана Нурсултан Назарбаев на самитѣ штатох Середней Азии понукнув намѣсто означѣня «Середня Азия и Казахстан» хосновати «Централна Азия». Того ся держить и Encyclopædia Britannica, котра не одличуе понятя «Середня Азия» и «Централна Азия», а оба понятя трактуе як «Central Asia».

Выданя UNESCO History of the Civilizations of Central Asia, опубликоване в року 1992, означать регион Central Asia як "Афганистан, сѣверовосточный Иран, сѣверный и середний Пакистан, сѣверну Индию, западный Китай, Монголию и бывшы совѣтскы середнеазийскы републикы".^[2]

Исторично о вплыв в регионѣ усиловали ся Британия, Россия, а тыж Персия и Китай.

Жерела и одказы

• Dani, A. H.; Masson, V. M.; Harmatta, J.; Puri, B. N.; Etemadi, G. F.; Litvinskiĭ, B. A. (1992–2005). History of civilizations of Central Asia.. Paris: Unesco. p. 8. ISBN 9789231027192. OCLC 28186754.
• Central Asia. Encyclopaedia Britannica. 28 Dec. 2018. https://www.britannica.com/place/Central-Asia.англ.