Шерпове

Шерпове, самоназвов шарxомбо — народ в Непалу (100 000 особ) тай Индии (15 000 особ).^[1] Подля списованя 2011 в Непалу число Шерпох было 112 946 особ. ^[2]

Шерпове

Родина Шерпох
Популация
115 000 особ
Регионы зо значнов популациов
Непал 100 000 особ [1] Индия 15 000 особ [1]
Языкы
кангпо, тибетскый, непали
Религия
будгизм, анимизм
Близкы етничны групы
Тибетяне

Ареал

Жиють на границѣ зоз Тибетом во высокогорю компактныма групами: в долинах Ликху-Кхола, Кхимти-Кхола до верхного току рѣкы Сун-Коси, в долинѣ Инукху-Кхола и на сѣверовосток от долины Катманду, даколько окремых сел лежить по рѣцѣ Арун, колония екзистуе в Дарджилингу (Индия).^[1]

Етногенеза и етноним

Поважуе ся, же мигровали зоз Тибета в XVI. сторочу.^[1] Етноним Шерпа, або Шарва, што ближе ку высловности, означать “восточны люде”^[3] в языку Тибетян, так и самоназва, до котрой входить зложка шар, што в языку Тибетян означать“восток”.^[1]

Занятя

Традичны занятя — земледѣлство и горске скотарство. Културы: пшениця, ярець, кромплѣ, татарка. Файты быдла: овцѣ, якы, дзо (мѣшанка яка и быка). Торгують зоз быдлом, вовнов, маслом, твердым сыром. Ремесла: ткацтво, лозоплетѣня, древорѣзба.^[1]

Од XX. стороча велика часть добрѣ зароблять як носичѣ и проводырѣ, в алпинистичных експедициях, а тыж як властникы новых, по европскы зарядженых готелох про туристы и алпинисты. Хоть Шерпы генетично адаптованы про высокогорскы выправы, до того часу они не лѣзали на околичны верхы, поважуючи их за бывалище Богох. Теперь, коли алпинистика стала ся их средством заробку, они и дале мають глубокый решпект ку горам и усилують ся удержати чужинцьох од знечестованя и засмѣчованя гор, од забиваня звѣрины и спальованя смѣтя, што по их представам може накликати гнѣв Богох.^[3]

Жерела и одказы

• Бобылёва О. Н.: Шерпа //Народы и религии мира: Энциклопедия / Гл. ред. В. А. Тишков, Редкол.: О. Ю. Артемова, С. А. Арутюнов, А. Н. Кожановский и др. — М.: Большая Российская энциклопедия, 1999. - 928 с: ил. ISBN 5-85270-155-6 С. 642.
• National Population and Housing Census 2011 (PDF, page 144). https://unstats.un.org/unsd/demographic/sources/census/wphc/Nepal/Nepal-Census-2011-Vol1.pdf. [перевірено 2019-07-24].
• Sherpa people. Encyclopaedia Britannica. https://www.britannica.com/topic/Sherpa-people. [перевірено 2019-07-25].