Штучный сателит

Штучный сателит — козмичный апарат, вынесеный на орбиту доокола Землѣ або иншой планеты за цѣльов научных або ужитковых задань. Подля меджинародной догоды, козмичный аппарат называють штучным сателитом, кедь ся он хоть лем еден раз обернув доокола цѣльовой планеты, в иншом припадѣ ся аппарат класификуе яко козмична сонда.^[1]

Меджинародна Козмична Станиця

24 сателиты системы глобалной навигации GPS суть умѣщены по четыри на каждой зоз шѣстьох орбит доокола Землѣ

Первый штучный сателит выпустив СССР 4. октобра 1957. З тым ся зачала доба козмонавтикы, але майже едночасно зачали ся и козмичны перемаганя меджи ривалами тогдышной студеной войны, СССР и США. Але позднѣйше многы державы увидѣли, же кооперация в козмонавтицѣ намного успѣшнѣйша. В сучасности найвекшым штучным сателитом Землѣ е Меджинародна Козмична Станиця, на яку мать на комерчной основѣ приступ кажда держава.^[2]

Типы сателитох

Суть понад десять розличных типох сателитох, найважнѣйшы з них:^[2][1]

• астрономичны,
• комуникачны,
• геофизичны,
• геодезичны,
• метеорологичны,
• навигачны,
• военскы,
• орбиталны станицѣ.

Число сателитох

В сучасности доокола Землѣ обертать ся понад 3000 фунгуючых и около 5000 покаженых штучных сателитох. А обще число створеных людьми объектох, векшых од 10 цм, обертаючых ся доокола Землѣ е понад 24500.^[3]

Найвекшы властникы штучных сателитох суть:^[4]

Властник	Фунгуючы	Покажены
Споены Штаты Америкы	1575	1070
Сполоченство Независимых Держав	1509	2013
Китайска людова република	324	76
Япония	173	58
Индия	89	10
Европска уния	87	12

Жерела и одказы

• Климишин І.А., Корсунь А.О. (ред.) Астрономічний енциклопедичний словник — Львів : Голов. астроном. обсерваторія НАН України : Львів. нац. ун-т ім. Івана Франка, 2003. — 548 c. ISBN 966-613-263-X. укр.
• What is a Satellite? //WiseGeek англ.
• How Many Satellites are Orbiting the Earth? //WiseGeek англ.