Бояров Алексей Федотович

Бояров Алексей Федотович (1896 - 20.10.1942) — Саха АССР үөрэх, доруобуйа харыстабылын уонна социальнай хааччыйыы наркома.

Байаҕантай улууһун Игидэй нэһилиэгэр 1896 сыллаахха төрөөбүт.

Крупская аатынан Москубатааҕы хомуньуустуу иитии академиятын бүтэрбит. Алдан уонна Уус-Алдан РИК-тарын бэрэстээтэлэ, Якутснабторг дириэктэрэ. 1920 сылтан ВКП(б) чилиэнэ.

1925 сыллаахха от ыйыгар Бүтүн Саха сиринээҕи учууталлар I сийиэстэрин тэрийбитэ биллэр. Сийиэскэ 49 дэлэгээт кыттыбыт. Онтон соҕотох киһи үрдүк үөрэхтээҕэ. Үөрэх уонна доруобуйа харыстабылын наркома Алексей Бояров сүрүн дакылааты оҥорбут. От ыйын 23 күнүгэр бу дакылаакка олоҕурбут сийиэс резолюцията ылыныллыбыт. Онно маннык тыллар бааллара:

Наша школа должна быть общественной. Нужно развернуть стены наших школ шире по проведению культурной работы среди населения, вести через школу общественно-полезные работы.

Национальный учитель ответственен за создание национальной школы.

Вопросы якутизации, вопросы подъема культуры якутского народа серьезно возлагаются на плечи национального учителя, разрешение их через национальную школу. Задачи громадны и задачи вдвойне ответственны.

1938 сыл тохсунньу 17 күнүгэр хаайыллыбыт. НКВД особай совещаниетын бириигэбэрэ 1941 сыл балаҕан ыйын 8 күнүгэр тахсыбыт: РСФСР холуобунай кодексатын 58 ыстатыйатын 2 уонна 11 пууннарынан буруйдаммыт, 8 сыл хаайыыга ууруллубут.

1942 сыллаахха алтынньы 20 күнүгэр Эһэ-Хайа хаайыытыгар өлбүт. 1956 сыллаахха Саха АССР Үрдүкү суутун бөрөсүүдьүмүн быһаарыытынан буруйа суоҕунан реабилитацияламмыт^[1].