Котенко Василий Дмитриевич

Котенко Василий Дмитриевич (27.12.1898-02.1922) — Саха сиригэр сэбиэскэй былааһы олохтоһооччу.

1898 сыллаахха ахсынньы 27 күнүгэр Екатеринослав күбүөрүнэтин Лошкаревка сэлиэнньэтигэр бааһынай дьиэ кэргэнигэр үһүс оҕонон төрөөбүтэ.

Екатеринславтааҕы 5 кылаастаах куорат училищетын бүтэрэн баран Севастопольга мореходнай училищеҕа киирбит. Иккис кууруска ыалдьан 1915 с. Екатеринославка төннүбүт. Уонна земскэй биэлсэр оскуолатыгар киирбит.

1917 сыллаахха дьалхаан саҕаламмытыгар эдэр киһи куоракка буолар тэрээһиннэргэ барытыгар кыттар. 1918 сыллаахха үөрэҕин быраҕан Кыһыл Аармыйаҕа суруттарар уонна Илин Сибииргэ барар. Иркутскайга кини чааһа Апполинарий Рыдзинскай этэрээтигэр киирэр, онон 1918 сыллаахха от ыйын 1 күнүгэр Дьокуускайы ылыыга кыттар.

Рыдзинскай этэрээтин кытта төннөрүгэр Котенко Дьокуускайга хаалар уонна үрүҥнэр куораты төннөрбүттэрин кэннэ Михаил Мегежекскэйдиин тыаҕа саһар. Биир ый оннук сылдьыбытын кэннэ тутан ылан Бүлүүгэ киллэрэллэр, кэлин Дьокуускай хаайыытыгар көһөрөллөр.

1919 сыллаахха былаас уларыйбытын кэннэ хаайыыттан босхоломмут. 1920 сыллаахха Свердлов аатынан Хомуньуус университетыгар үөрэххэ ыытыллыбыт, ахсынньыга Дьокуускайга төннүбүт уонна Губсовнархоз бэрэссэдээтэлинэн анаммыт, 1921 сыллаахха олунньуга баартыйа күбүөрүнэтээҕи бюротун чилиэнэ буолбут.

1921 с. Уһук Хоту тыҥааһыннаах балаһыанньа үөскээбитигэр Саха сирин губревкомун Хотугу уокурукка уонна Хамчааккаҕа боломуочунайынан анаммыт. Халымаҕа тиийэн улахан үлэни ыыппыт. 1922 сыл олунньутугар саҥа былаас өстөөхтөрө тутан ылан өлөрөн кэбиспиттэр.

Аатын үйэтитии

• Кини аатынан 1977 сыллаахха Дьокуускайга урукку Ново-Курашова-3 уулусса ааттаммыта^[1].
• Чокуурдаахха киниэхэ аналлаах мэҥэ туруоруллубута.