Крылов Дмитрий Михайлович

Крылов Дмитрий Михайлович (1906—1968) — хирург, учуонай, Саха сиригэр мэдиссиинэ үрдүкү үөрэҕин төрүттээбит дьонтон биирдэстэрэ. Иккис аан дойду сэриитин кыттыылааҕа, мэдиссиинэ байыаннай сулууспатын полковнига. 35 бэчээттэммит билим үлэлээх, Москубаҕа, Ленинградка, Дьокуускайга уонна ССРС атын куораттарыгар ыытыллыбыт научнай конференцияларга 50 дакылааты уонна үлэни оҥорбута.

Олоҕун олуктара

1906 сыллаахха балаҕан ыйын 22 күнүгэр Орловскай губерния Багриново сэлиэнньэтигэр, билигин Орел уобалаһын Болховскай оройуонугар төрөөбүт.

Оскуоланы бутэрэн баран, 1926 сыллаахха Ленинградка Глинкатаагы металлургическай комбинат рабочайынан үлэлээбитэ. Карл Маркс. 1927 сыллаахха Ленинградтааҕы 2-с мединститут (билигин И.И. Мечников аатынан Санкт-Петербург судаарыстыбаннай медакадемията) үөрэнэ киирбитэ уонна салгыы Ленинградтааҕы сэллик хирургиятын аспирантуратыгар үөрэнэн 1934 с. «Клинико-рентгенологические и патолого-анатомические изменения в тазобедренном суставе» диэн үлэни көмүскээбитэ.

Дмитрий Крылов 1937 сылтан Ленинградтаагы Сэллик хирургическай институтун отделение сэбиэдиссэйинэн, 1939 сылтан дириэктэри солбуйааччынан, онтон 1940 сылтан дириэктэринэн үлэлээбитэ.

Сэрии кэмигэр блокадаламмыт Ленинградка байыаннай медигынан үлэлээбитэ ^[1]. Ону тэҥэ Ленинград хомуньуус баартыйатын горкомун чилиэнэ этэ^[2].

Крылов 1944 сыллаахха «Специфические изменения в костном мозгу и синовиальных оболочках при гематогенных формах туберкулеза» диэн дукотарга диссэртээссийэтин көмүскээбитэ. 1947 сыллаахха бэрэпиэссэр аата иҥэриллибитэ. 1953 сыллаахха РСФСР минздравын направлениетынан Саха АССР-га ыытыллыбыта, онно ССРС Сэллик институтун Дьокуускайдааҕы филиалын (ЯФИТ АМН СССР) дириэктэрин билимҥэ солбуйааччынан анаммыта, ону тэҥэ куораттааҕы сэллик балыыһатыгар уҥуох отделениятын сэбиэдиссэйиэн үлэлээбитэ.

1956 сыллаахха Саха государственнай университета арылларыгар медфагы тэрийэргэ ыҥырыллыбыта. Кини бастаан айылҕа билимнэрин факультеттарын (естественных наук) деканынан, онтон ол факультет мэдиссиинэҕэ кафедратын салайааччытынан үлэлээбитэ. 1960 сыллаахха Д.М. Крылов кыһамньытынан бу кафедраҕа олоҕуран ЯГУ медиссиинэ факультета тэриллибитэ. 1965 сыллааха диэри мэдиссиинэ факультетын дэкээнэ этэ.

1968 сыллаахха тохсунньу 25 күнүгэр өлбүтэ.

Кэргэнэ Крылова Татьяна, саха дьахталларыттан бастакы мэдиссиинэ билимин дуоктара.