Осетрово (пуорт)

Осетрово — Өлүөнэ өрүс баһыгар баар өрүс пуорда, билигин Иркутскай уобалас Уус-Кут куоратыгар киирэр, Саха сирин таһаҕаһынан хааччыйыыга улахан суолталаах. Сэбиэскэй кэмҥэ Өлүөнэ өрүс пароходствотын сорҕото этэ.

Уруккута Уус-Куттан сэттэ килэмиэтирдээх Осетрово дэриэбинэҕэ бастаан бириистэн баара (бириистэн быһыытынан 1929 сыллаахха олохтоммут дэнэр). 1930 сыллаахха бириистэн нөҥүө 10 тыһ. туонна таһаҕас ааспыт. Ол саҕана сүнньүнэн Осетровоҕа таһаҕаһы сыарҕанан эбэтэр кыра аалларынан Өлүөнэ баһыттан тиэйэн аҕалаллара.

1935 сыллаахха от ыйын 21 күнүгэр Осетровоҕа өрүс пуордун тутарга уонна онно мас ааллары тутарга диэн ВКП(б) Саха обкуомун уурааҕа тахсыбыт.

Уус-Кут бөһүөлэккэ Өлүөнэ диэн ааттаммыт тимир суол станцията тутуллуоҕуттан таһаҕаһын ахсаана биллэрдик элбээбитэ. Бу Өлүөнэ станцияҕа пуойастар Тайшеттан кэлэр этилэр. Бастакы пуойас 1950 сыллаахха кэлбит. "Тайшет-Өлүөнэ" тимир суол толору эксплуатацияҕа 1958 сыллаахха киирбит.

1954 сыллаахха икки бөһүөлэк Уус-Кут уонна Осетрово холбоһон Уус-Кут куорат үөскээбитэ^[1]. Ол эрээри бириистэн аата уларыйбатаҕа, Остеровоннан хаалбыта.

1958 сыл атырдьах ыйын 4 күнүгэр бириистэн "Өлүөнэ өрүс пароходствотун Осетрово өрүс пуорда" диэн ааттаммыта.

Билигин «Осетровский речной порт» тэрилтэни ГК «Старвей» диэн тэрилтэ бас билэр. Бу тэрилтэҕэ өссө ОП «Осетровская судоходная компания», ООО «Речсервис», ООО «Ленская грузовая компания», ООО «Речной порт Якутск», ООО "Судоходная компания «Якутск», ООО "Судоходная компания «Вилюй», ООО «Старвей-Логистика» уонна «АльянсАвтоГрупп» диэн автотранспортнай хампаанньалар бөлөхтөрө киирэр. Маны таһынан ГК «Старвей» Алын Бэстээххэ баар АО «Госснабсбыт Якутии» транспортно-логистическай киини салайан үлэлэтэр (оперативное управление).