Сиэрбийэ ыһыаҕа

Сиэрбийэ ыһыаҕа эбэтэр Дьобуруопа бастакы ыһыаҕа — 2017 сыллаахха Сиэрбийэҕэ сахалар тэрийбит ыһыахтара. Сүрүн тэрийээччи Лариса Кулаковская.

2017 сыллаахха Лариса Кулаковская уонна худуоһунньук Георгий Аргунов тэрийбиттэрэ. Прогар куоракка бэс ыйын 14 күнүгэр буолбут^[1] тэрээһиҥҥэ олохтоох дьон көхтөөх кыттыыны ылбыттара. Аан бастаан тэрийэр туһунан толкуйдуулларыгар Саха Өрөспүүбүлүкэтэ диэн баай култууралаах сир баарын Сиэрбийэ олохтоохторугар билиһиннэрэр соруктаахтар этэ. Лариса Реасовна этэринэн, аан бастакыттан Сиэрбийэҕэ ыытыллар ыһыаҕы Саха сирин биллэр дьоно, олор истэригэр бастакы бэрэсидьиэн Михаил Николаев, өйөөбүттэрэ^[2].

Бастакы ыһыахтары тэрийэргэ улахан көмөнү Лариса Реасовна дьүөгэтэ Радосава Йович оҥорбута — оннук, кини бастаан Весна Шалович диэн оройуон бэрэсидьиэнин кытта билиһиннэрбит. Онтон иккиэн кыттыһан Сиэрбийэ бырабыыталыстыбатыгар, Белград дьаһалтатыгар тахсан өйөбүл ылбыттар. Ону таһынан бастакы тэрээһиҥҥэ көмөнү Сиэрбийэҕэ Арассыыйа посольствота, СӨ Москубатааҕы бэрэстэбиитэлистибэтэ оҥорбуттара, ону таһынан Хаҥалас улууһун самодеятельнай артыыстара улахан өйөбүлү оҥорбуттар. Бу ыһыах Дьобуруопа таһымнаах буолбута, 11 дойдуттан сахалар тиийэн ыһыахтаабыттара. Ыһыах тэрээһиннэрэ Сиэрбийэ бастакы ханаалынан уонна кыраныысса таһыгар олорор сиэрбтэр көрөр Pink диэн ханаалларынан көстүбүтэ.

Суолтата уонна ситимнээх түгэннэр

Бу бөдөҥ тэрээһинтэн сиэттэрэн, ситиһиилээхтик ааспытыттан эр ылан кыраныысса таһыгар олохсуйбут саха дьоно араас дойдуларга ыһыах тэрийэр буолбуттара.

Ону таһынан Сиэрбийэҕэ бэйэтигэр Саха култууратыгар сыһыаннаах түгэннэр, тэрээһиннэр буолбуттара. Холобур, Сиэрбийэҕэ этно бэстибээл ыытар туһунан өйүк (санаа) Гордана Грубейшич сахалар бастакы ыһыахтарыгар сылдьыбытын кэннэ үөскээбитэ. Ол кэнниттэн тэриллибит Сиэрбийэ Бастакы этно бэстибээлигэр саха иистэнээччилэрэ Вячеслав Зайцевы тэҥэ бэйэлэрин оҥоһуктарын көрдөрбүттэрэ. Иккис холобур: Белград этнографиятын түмэлин кытта үлэ олохтонуута: түмэлгэ XVII үйэтээҕи саха дьахтарын кыһыҥҥы таҥаһа бэлэхтэммитэ уонна билигин көрдөрүүгэ турар. 2024 сыллаахха эмиэ этнография түмэлигэр Саха сирин артыыстара кыттыылаах кэнсиэр буолбута, олохтоохтор уонна Арассыыйа, Казахстан посольстволарын үлэһиттэрин биһирэбилин ылбыта. Үһүс холобур — Кирииллиссэ түмэлин кытта бииргэ үлэ. Бу түмэлгэ бастаан Саха норуодунай бэйиэтэ Владимир Федоров сылдьан баран саха экспозициятын тэрийэр туһунан этии киллэрбит, онно Өксөкүлээх Өлөксөй бүүһүн туруоруохха сөбүн ыйбыт. Онтон Раиса Реасовна көҕүлээн Өксөкүлээх бүүһэ түмэл тиэргэнигэр Суруйааччылар аллеяларыгар турбута. Маны таһынан саха-дьүкээгир суруйааччыта Тэки Одулок бүүһэ (муосчут Федор Марков оҥоруута) бу аллеяҕа туруохтаах. Маны таһынан Белградка СӨ бэрэстэбиитэлистибэтин арыйар туһунан боппуруос үөрэтиллэр сылдьар (РФ Сиэрбийэҕэ посолун солбуйааччы А.А. Кононыхин көҕүлээһининэн).