Эльбрус

Эльбрус — мөлүйүөн сыл анараа өттүгэр үөскээбит, былыргы утуйа сытар вулкан. Арассыыйа уонна Дьопуруопа муҥутуур үрдүк хайа чыпчаала. Хайа икки чыпчааллаах: бастаан Арҕааҥҥыта (5642 миэтэрэ) үөскээбит, онтон Илинҥитэ (муҥутуур үрдүк туочуката — 5621 миэтэрэ).

Эльбрус тоҥмут лаабаттан, күлтэн уонна вулканическай туфтартан турар, онтон муҥутуур былыргы боруодаларын сааһа үс мөлүйүөн сыл кэриҥэ. Учуонайдар этиилэринэн, кини устуоруйатыгар түөрт төгүл кэриҥэ эстибит. Ордук күүстээх эстии 225000 сыл аннараа өттүгэр буолбут, онтон хойуккута — 2000 сыл аннараа өттүгэр.

Хайа эниэтэ үксүнэн намыһах, ол эрэн сыыйа иҥнэйии муннуга уларыйар. Билигин кини 35 кыраадыс кэриҥэ. Чыпчаалларга элбэх тарыҥнар бааллар, олор Хотугу Кавказ муҥутуур улахан өрүһүн — Кубань өрүһү — уунан хааччыйаллар.