Interfache òmine-màchina

Un'interfache òmine-màchina (fintzas Interfache de impitadore. S'agatat su faeddu interfàtzia^[1] puru, ma àteros autores non ddu racumandant^[2]) si referit a su pìgiu chi separat un'èssere umanu dae sa màchina chi est impreende, cunsentende s'interatzione retzìproca^[3].

Interfàtzia òmine-màchina de una màchina utensile cun controllu numèricu computerizadu (CNC)

In generale, s'espressione si podet referire a una màchina de cale si siat natura, comente a unu carculadore, telefoneddu, televisore, machinàriu industriale, etc.

Esempros de interfaches òmine-màchina sunt:

• s'impare de is aparatos hardware chi impreat un'impitadore pro imbiare e retzire informatziones dae unu carculadore, comente sistemas de punnamentu (pro esempru mouse), tastera e ischermu
• s'interfache gràfica de unu programma, chi podet cumprèndere a esèmpiu ventanas, iconas, etc., opuru, pro is sistemas prus simpres, podet èssere costituida dae un'interfache a lìnia de cumandu;
• su pannellu de controllu de unu machinàriu, costituidu dae butones, levas de cumandu, ischermos, indicadores luminosos, etc.

Descritzione

S'interfache de impitadore cumprendet su flussu de informatziones pro su suportu de is detzisiones, a traessu de:

• messàgios visivos - a su sòlitu, frunidos dae un'ischermu;
• messàgios sonoros - altoparlantes, sirenas, sistemas ràdiu;
• atziones de controllu - tastieras, butones, interrutores.

Prus ischermos, dispositivos e superfìtzies de controllu format una console o istatzione de controllu.

Una sala de controllu podet cuntènnere una o prus istatziones de controllu.

Sala de controllu de una tzentrale nucleare

Sa sala de controllu e is istatziones de controllu podent èssere agatadas in medas cuntestos diferentes, comente a esempru:

• Turre de controllu de un'aeroportu;
• Tzentru de controllu de politzia e ambulantza;
• Tzentrale nucleare.

Su progetu de s'abitàculu de aeroplanos e elicòteros cumprendet su progetu de interfaches de impitadore ispetzializadas, ma fintzas a trastos de impreu ispainadu comente isciacuadoras o isciacuaistèrgiu ddis faghet bisòngiu un'interfache.

In ònnia manera, pro is interfaches òmine-màchina sunt de importu mannu is cuntzetos de impreabilidade e atzessibilidade pro garantire un'impreu intuitivu de sa màchina matessi a onni casta de sugetu e chi s'ispissu nde detzident s'èsitu cummertziale comente acontèssidu pro is personal computer.

In s'indùstria de is autoveturas, cun s'ispainadura de is cuadros de cumandu digitales, est essende semper prus de importu s'istùdiu fundudu de mègius interfaches òmine-màchina.

In informàtica

S'ischermu de unu computer est un'esèmpiu de interfache òmine-màchina.

Interfache a lìnia de cumandu

Interfache gràfica KDE

In su campu de s'informàtica, a s'ispissu is interfaches de impitadore ladu-software sunt gràficas (Graphical User Interface o GUI) e permitint s'interatzione de s'impitadore cun su software (sistemas operativos e aplicatziones) a traessu de metàforas gràficas chi nde faghent s'impreu prus simpre. Est fitianu fintzas s'impreu de interfaches a lìnia de cumandu (Command Line Interface, CLI), cun cumandos de insertare cun una tastera.