Intrada/essida

S'intrada/essida (connotu puru cummenti input/output, de s'ingresu, acurtzau cummenti I/O) est sa parti de su sistema operativu ca permitit a s'impitadori de impreai is dispositivus eletrònicus collegaus a un'elaboradori.

Articulu in campidanesu

Sa manera de cuntziderai s'I/E dipendit a manera forti de s'àmbitu de studiu. Is ingenneris eletrònicus cuntziderant is cumponentis fìsicus de is dispositivus, cummenti cavus, fontis de alimentatzioni e circuitus integraus. Is programmadoris invècias depint manigiai is interfàtzias lassadas a disponimentu de sa programmera: is cumandus acetaus de su dispositivu, is datus ca aspetat de ligi e sa manera de signalai faddinas.^[1] Po urtimu, s'impitadori depit bii is datus de imbiai o arricius de su dispositivu in una forma ca podit cumprendi. Custus podint essi in forma de testu, figuras, sonus, etc.

Dispositivus

Is dispositivus podint essi classificaus cummenti dispositivus de intrada, ca imbiant is datus a s'elaboradori. Esèmpius funt su ratu (mouse) e su digitalizadori (scanner). Is dispositivus de essida funt invècias is chi arricint is datus, cummenti su schermu e s'imprentadora. Oi a dii, est raru ca unu dispositivu siat sceti de intrada o de essida e calincunu, cummenti is discus e is crais USB, ca funt s'unu e s'atru a su pròpriu tempus.