Larentu Pusceddu

Larentu Pusceddu, (Oroteddi, 6 de freàrgiu de su 1947 - Roma, 9 de ghennàrgiu de su 2016^[1][2][3]) est istadu un'iscritore, poeta, cantadore^[4], giornalista e dirigente sindacale sardu.

Custu artìculu est iscritu cun sa grafia Limba Sarda Comuna. Abbàida sas àteras bariedades gràficas:

campidanesu · logudoresu · nugoresu

Larentu Pusceddu
Àteros nùmenes	Lorenzo Pusceddu
Nàschida	6 de freàrgiu de su 1947 Oroteddi
Morte	9 de ghennàrgiu de su 2016 Roma
Traballu	iscritore, poeta, cantadore e giornalista
Professione	dirigente sindicale de sa CGIL
Prèmios	Prèmiu Tzitade de Otieri (2003) Prèmiu Casteddu de sa Fae (2006)
Contributos de importu	Autore de su primu romanzu in limba sarda de s'istòria

Biografia

Diplomadu in Agrària, est istadu dirigente sindicale de sa CGIL in Thiniscole, in ue istaiat dae su 1973 cun sa mugere Luisa e sos fìgios Igor e Danila. At collaboradu cun giornales e televisiones: Sa Sardigna, Natzione Sarda, La Nuova Sardegna e Telesardegna.

At iscritu poesias, contos, romanzos. Pro custu, l'ant dadu reconnoschimentos in prèmios literàrios: Tzitade de Otieri^[5], Meilogu, Romàngia, Bonorva, Macumere, Durgali, Oroteddi, Nùgoro, Mamujada, Casteddu, Pasada, Ossi, Mores, etc.

In su 1979 at publicadu Dae s'umbra de s'ístoria unu discu a 33 giros de mùsica in limba sarda, cun s'eticheta "Edizioni dell'Isola".^[6]

In su 1982 at iscritu S'àrvore de sos Tzinesos, su primu romanzu in sardu de semper, publicadu dae sa domo editora "Editziones de sa Nae" de Nùgoro.^[7][8][9][2]

In su 1991 at publicadu su de duos romanzos suos, Mastru Taras, cun sa Papiros de Nùgoro, e in su 2006, semper cun issos, Dona Mallena^[10], romanzu cun su cale at bìnchidu su Prèmiu Casteddu de sa Fae de Pasada.

In su 2005, imbetzes, at publicadu Pipinidas e Iscazas: Contos pro feduliu, una regorta de contos, cun sa domo editora Solinas, e in su 2008 at bortadu a su sardu una regorta de poesias de su poeta armenu Daniel Varujan, publicadas cun su tìtulu Su canticu de su pane.

In su 2011 est torradu a sos romanzos cun Sordadu Nangu: De gherra e de amore, publicadu cun sa Condaghes, chi contat s'istòria de unu sordadu in sos annos de sa prima gherra mundiale.^[11]

Est mortu in su 2016, in Roma, lassende unu romanzu galu non publicadu, S'arzola de s'ena, chi est essidu in su 2017 cun sa Papiros.^[12]

Òperas

Musicales

• Dae s'umbra de s'ístoria [LP] (Edizioni dell'Isola, 1979);

Literàrias

Comente autore

• S'àrvore de sos Tzinesos, Nùgoro, Editziones de sa Nae, 1982, OCLC 879922769, SBN IT\ICCU\CAG\0026936. Versione torrada a imprentare: Larentu Pusceddu, S'àrvore de sos Tzinesos, Nùgoro, Papiros, 2019, ISBN 978-88-9803-569-4, SBN IT\ICCU\CAG\2087706.;
• Mastru Taras, Nùgoro, Papiros, 1991, ISBN 978-88-8513-822-3, OCLC 879925256, SBN IT\ICCU\CAG\0002525.;
• Su belu de sa bonaura, Nùgoro, Papiros, 2001, ISBN 978-88-8513-873-5, OCLC 879896802, SBN IT\ICCU\CAG\0097412.;
• Pipinidas e Iscazas: Contos pro feduliu, Nùgoro, Solinas, 2005, ISBN 978-66-0006-497-0, SBN IT\ICCU\CAG\162159.;
• Dona Mallena, Casteddu, Condaghes, 2007, ISBN 978-88-7356-109-5, OCLC 955197751, SBN IT\ICCU\CAG\1380534.;
• Sordadu Nangu: De gherra e de amore, Casteddu, Condaghes, 2011, ISBN 978-88-7356-152-1, OCLC 955216174, SBN IT\ICCU\CAG\1853530.;
• S'arzola de s'ena, Nùgoro, Papiros, 2017, ISBN 978-88-9803-524-3, SBN IT\ICCU\CAG\2081877..

Comente tradutore

• Daniel Varujan, Su canticu de su pane: Il canto del pane, tradutzione de Larentu Pusceddu, Pàdova, Libreria Padovana Editrice, 2008, ISBN 978-88-8977-515-8, SBN IT\ICCU\CAG\1618245. (tradutzione in sardu de poesias de su poeta armenu).