Giuseppi Lanza, Duca di Camastra

Giuseppi Lanza, duca di Camastra (Palermu, 1630 – 1708), fu maggistratu e rapprisintanti dû règgiu cuvernu spagnolu, ma parò è canusciutu pi lu sò bonu travaghiu ntâ ricustruzzioni di Catania doppu lu granni tirrimotu dû 11 di jinnaru 1693, ca sdirrubbau la cità ettinnèa e fici assai danni nta tuttu lu cumprinsòriu sud-uriintali di l'ìsula.

Lu duca di Camastra eppi dû viciré Uzeda la nòmina a vicariu ginirali pi lu Val Demone e, doppu macari pi lu Val di Notu, pô scopu di fruntiggiari la drammàtica situazzioni ca s'avìa criatu e di prugrammari la ricustruzzioni. Grazzi a la spirènzia c'avìa ntô campu di l'urbanistica e a la cullabburazzioni dû ngigneri militari Carlos De Grunembergh, Giuseppi Lanza, pigghiau nu rolu assai mpurtanti pô sviluppu dû baroccu sicilianu di lu Val di Notu.

A iddu s'hà diri grazzi pi l'avvinirìsticu (pi l'èbbica) disegnu dâ nova Catania ricustruita, appruvatu dû Cunsigghu pi la riedificazzioni di Catania - di iddu stituitu e prisidutu - ntâ siduta dô 28 di giugnu 1694, ca stabbilìu pi prima cosa ca li strati di custruìrisi avìanu èssiri tutti a lìnia ritta, làrichi e spazziusi, ncruciati d"àutri strati chê stissi carattirìstichi. Li strati e li chiazzi dû centru baroccu di Catania ancora aoggi nni sù la tistimunianza.

Pi sapìrinni cchiôssai, talìa puru Ricustruzzioni di Catania doppu lu tirrimotu dû 1693.