Asggʷas amaziɣ
From Wikipedia, the free encyclopedia
Asmlussan Amaziɣ (Assad gis iga : Akṛas 29 Bṛayṛ 2974)iga yan usmlussan anflaḥ lli ssmrasn imaziɣn. Ar ittyusmras i uslgn n twuriwin n tfllaḥt n ku annaz.
Asmlussan Ahijri lli ibddn f yirn, ur igi i tfllaḥt acku izdi d wannazn n usggʷas. Ɣ yidɣarn yaḍn ɣ umaḍal anslm, ar ssmrasn mddn Asmlussan Ayṛani (n Iran taqburt) nɣ Aqubṭi nɣ Aṛumi (g uwank n Ayt Ɛtman) nɣ kra n usmlussan yaḍn ibddn f Usmlussan Ayulyan.
Asmlussan Amaziɣ atrar iffɣ d zɣ usmlussan Ayulyan, ig taysi zɣ uzmz ɣ tmnaḍt taṛumant Mauritanya Taqaysart d tmnaḍt taṛumant n Afrika. Ikka tt inn Usmlussan Ayulyan da ittyusmras ɣ Uruppa dat n ummati s Asmlussan Agriguri, kkin d yismawn n yirn nns Talatint. Kkan tt inn imaziɣn ar yadlli ssmrasn mmnaw n ismlussann ibldiyn zun d win igwanciyn ɣ tgzirt n ukanari, macc idrus mad ittyussann f ingrawn ad iqburn.