ஐதரசன் பாலியாக்சைடு
வேதிச்சேர்மம் / From Wikipedia, the free encyclopedia
ஐதரசன் பாலியாக்சைடுகள் (Hydrogen polyoxides) என்பவை ஐதரசன், ஆக்சிசன் அணுக்களை மட்டுமே கொண்டு உருவாகும் வேதிச்சேர்மங்களாகும். ஆக்சிடேன்கள், ஆக்சோ ஐதரசன்கள், ஆக்சி ஐதரசன்கள் என்ற பெயர்களாலும் இவை அழைக்கப்படுகின்றன. குறிப்பாக இவற்றிலுள்ள அணுக்கள் ஒற்றைப் பிணைப்புகளால் பிணைக்கப்பட்டிருக்கின்றன. நிறைவுற்றவை என வகைப்படுத்தப்படும் இவற்றின் கட்டமைப்பில் வளையங்கள், சுற்றுகள் போன்ற வடிவங்கள் ஏதுமிருப்பதில்லை. எனவே இவற்றை ஐதரசன் சால்கோகெனைட்டுகள் என்று வகைப்படுத்தலாம்.
தண்ணீர் ஓர் எளிய ஐதரசன் பாலியாக்சைடு ஆகும். இதன் மூலக்கூற்று வாய்ப்பாடு H2O ஆகும். சில ஆக்சிசன் அணுக்கள் ஒரு சங்கிலியில் ஒன்றுடன் ஒன்று ஒற்றைப் பிணைப்பால் பிணைக்கப்பட்டிருப்பது இவ்வகை மூலக்கூறுகளின் பொது கட்டமைப்பாகும். இத்தகைய ஆக்சிசன் கூட்டின் இரண்டு முனையும் ஐதரசன் அணுக்களுடன் இணைக்கப்பட்டிருக்கும். இவ்வாறு இத்தகைய சேர்மங்கள் யாவும் H2On என்ற பொதுவாய்ப்பாட்டுடன் ஒத்தவரிசைச் சேர்மங்களை உருவாக்குகின்றன. இவ்வரிசைச் சேர்மங்களுக்கிடையே உள்ள பொது வித்தியாசம் கூடுதலாகச் சேர்கின்ற ஆக்சிசன் அணுவின் மூலக்கூற்று நிறையான 16 ஆக இருக்கும். ஐதரசன் பாலியக்சைடின் உருவ அளவை விளக்குவதற்கு அம்மூலக்கூறில் உள்ள ஆக்சிசன் அணுக்களின் எண்ணிக்கை பயன்படுகிறது. உதாரணமாக ஐதரசன் [பென் டாக்சைடைக் கூறலாம். இதில் ஐந்து ஆக்சிசன் அணுக்கள் இருக்கின்றன.
ஒர் ஆக்சிடேனைல் தொகுதி என்பது ஒரு வேதி வினைக்குழுவாகும். இதை பக்கச்சங்கிலி என்றும் அழைப்பர். இதிலும் ஐதரசன் பாலியாக்சைடைப் போலவே முழுவதுமாக ஐதரசன் மற்றும் ஆக்சிசன் அணுக்கள் ஒற்றைப் பிணைப்பால் பிணைக்கப்பட்டுள்ளன. ஆக்சிடைல் எனப்படும் ஐதராக்சி அல்லது ஐதரோபெராக்சி எனப்படும் டைஆக்சிடைனைல் தொகுதி போன்றவை உதாரணங்களாகும்.