![cover image](https://wikiwandv2-19431.kxcdn.com/_next/image?url=https://upload.wikimedia.org/wikipedia/commons/thumb/a/a1/Turkish_Strait_disambig.svg/langta-640px-Turkish_Strait_disambig.svg.png&w=640&q=50)
தார்தனெல்சு நீரிணை
வடமேற்கு துருக்கியில் நீரிணை / From Wikipedia, the free encyclopedia
தார்தனெல்சு (Dardanelles, (/dɑːrdəˈnɛlz/; துருக்கியம்: Çanakkale Boğazı, கிரேக்க மொழி: Δαρδανέλλια), செவ்வியல் தொன்மைக்காலத்து எல்லெசுபொன்ட் (Hellespont) (/ˈhɛlɪspɒnt/; கிரேக்கம்: Ἑλλήσποντος, Hellespontos, தமிழில் "எலியின் கடல்"), துருக்கியின் வடமேற்கிலுள்ள குறுகலான இயற்கை நீரிணை ஆகும். இது பன்னாட்டளவில் மிகவும் குறிப்பிடத்தக்க நீர்வழியாகும். இது ஐரோப்பா, ஆசியா கண்டங்களின் எல்லையில் அமைந்துள்ளது. ஆசிய துருக்கியையும் ஐரோப்பிய துருக்கியையும் பிரிக்கிறது. பன்னாட்டுக் கடற் போக்குவரத்தில் பயன்படுத்தப்படும் உலகின் மிகக் குறுகலான நீரிணைகளில் ஒன்றாக விளங்குகின்றது. இந்த நீரிணை மர்மரா கடலை ஏஜியன், நடுநிலக் கடல்களுடன் இணைக்கிறது. அதே சமயம் பொசுபோரசு வழியாக கருங்கடலுக்கும் வழியமைக்கிறது. தார்தனெல்சு 61 கிமீ (38 மைல்) நீளமும், 1.2 முதல் 6 கிமீ (0.75 முதல் 3.73 மைல்) அகலமும் உள்ளது. மிகுந்த ஆழப்பகுதி கனக்கலே நகரருகே இதன் மிகக் குறுகலான பகுதியில் 103 மீ (338 அடி) உள்ளது. சராசரியாக இதன் ஆழம் 55 மீ (180 அடி).
![Thumb image](http://upload.wikimedia.org/wikipedia/commons/thumb/a/a1/Turkish_Strait_disambig.svg/320px-Turkish_Strait_disambig.svg.png)
![Thumb image](http://upload.wikimedia.org/wikipedia/commons/thumb/c/c6/Gallipoli_peninsula_from_space.png/640px-Gallipoli_peninsula_from_space.png)
![Thumb image](http://upload.wikimedia.org/wikipedia/commons/thumb/a/a5/Dardanelles_map2.png/640px-Dardanelles_map2.png)
இந்த நீரிணையின் வட பகுதியில் மக்கள் குடியேற்றம் குறிப்பிடும்படி இல்லை; ஆனால் தெற்கில் 110,000 மக்கள்தொகை கொண்ட கனக்கலே நகரம் உள்ளது.
பொசுபோரசும், தார்தனெல்சும் கூட்டாக துருக்கிய நீரிணைகள் எனப்படுகின்றன.