நூலகக் கட்டிடம்
From Wikipedia, the free encyclopedia
நூலகக் கட்டிடம் என்பது நூலகம் ஒன்றின் செயற்பாடுகள் இடம்பெறுவதற்கான வசதிகளை உள்ளடக்கும் வகையில் சிறப்பாக வடிவமைக்கப்படும் கட்டிடத்தைக் குறிக்கும். நூலகங்களை அமைக்கும் வழக்கம் மிகப் பழைய காலத்திலேயே இருந்திருந்தாலும், கல்வி வசதிகள் எல்லோருக்கும் கிடைக்கும்படி வளர்ச்சியடைந்தமை, அச்சுத் தொழில்நுட்பத்தின் வளர்ச்சி, அதிகரித்த அறிவுத் தேவைகள் என்பன நூலகங்களின் தேவையை அதிகரித்துள்ளன. நூலகச் செயற்பாடுகளின் சிக்கல்தன்மை அதிகரித்துக்கொண்டு வந்தபோது அச் செயற்பாடுகளுக்குத் தேவையான வசதிகளும் அவற்றுக்கு ஏற்றாற்போல அமைய வேண்டியதாயிற்று. இதனால் இவ்வசதிகளை வழங்கும் கட்டிடங்களும் நூலகத்தின் தேவைகளுக்காகச் சிறப்பாக்கம் பெற வேண்டிய தேவை ஏற்பட்டது. இதனால் நூலகங்களுக்கெனச் சிறப்புத் தன்மை கொண்ட கட்டிடங்களை வடிவமைத்துக் கட்டினர்.
இக்கட்டுரையைச் சரிபார்ப்பதற்காக மேலதிக மேற்கோள்கள் தேவைப்படுகின்றன. |
ஒரு நூலகத்தின் முக்கியமான செயற்பாடு பலவகையான நூல்களைச் சேமித்து வைப்பதும் அவற்றைப் பேணுவதும் ஆகும். அத்தோடு, நூலகத்தின் பயனர்கள் நூல்களை எடுத்து வாசிப்பதற்கான வசதிகள்; நூல்களைப் பயனர்கள் இரவல் வாங்குவதற்கான வசதிகள்; நூலகப் பணியாளர்களுக்கான வசதிகள்; பயனர்களுக்கும் பணியாளருக்குமான உணவு வசதிகள், கழிப்பறை வசதிகள்; நீர், மின்சாரம், மற்றும் பிற தேவைகளை வழங்குவதற்கான வசதிகள், கட்டிடப் பராமரிப்புக்கான வசதிகள் என்பனவும் நூலகக் கட்டிடம் ஒன்றிற்கு அவசியமானவை.