ఎగువ శ్వాసమార్గం
From Wikipedia, the free encyclopedia
ప్రాణికోటి జీవక్రియలో శ్వాసక్రియ చాలా ముఖ్యం. ఈ క్రియలో ప్రాణవాయువు స్వీకరించబడి, బొగ్గుపులుసువాయువు విసర్జింపబడుతుంది. క్షీరదములలోను, వెన్నెముక గల ఇతరజంతువులలోను, ఇతర పెద్ద జంతువులలోను శ్వాసక్రియను ఊపిరితిత్తులు నిర్వహిస్తాయి. క్షీరదములలో గాలి ఉచ్ఛ్వాసములో ముక్కు ద్వారా దేహములోనికి ప్రవేశించి శ్వాసమార్గము ద్వారా ఛాతిలో ఉన్న ఊపిరితిత్తులకు చేరుతుంది.
నిశ్వాసములో గాలి ఊపిరితిత్తులనుండి శ్వాసమార్గము ద్వారా ప్రసరించి ముక్కు ద్వారా వాతావరణములోనికి విసర్జింపబడుతుంది. ఊపిరితిత్తులు ప్రాణవాయువును రక్తమునకు చేర్చి, రక్తములోని బొగ్గుపులుసువాయువును విసర్జిస్తాయి. ఊపిరితిత్తుల వ్యాధులే కాక శ్వాసమార్గములో అడ్డంకులున్నా శ్వాసక్రియకు భంగం కలిగి శ్వాసవైఫల్యం కలిగే అవకాశం ఉంది.
ముక్కు నుండి స్వరపేటిక వఱకు గల శ్వాసమార్గం ఎగువ శ్వాసమార్గం (ఊర్ధ్వశ్వాసపథం/upper airway). స్వరపేటిక నుంచి ఊపిరితిత్తుల వఱకు ఉన్న శ్వాసమార్గం అధో శ్వాసపథం (దిగువ శ్వాసమార్గం/lower airway).