అంతర్జాతీయ క్రికెట్ కౌన్సిల్ సభ్యుల జాబితా
From Wikipedia, the free encyclopedia
అంతర్జాతీయ క్రికెట్ మండలి (ఐసిసి) 1909 జూన్ 15 న లార్డ్స్లో ఇంపీరియల్ క్రికెట్ కాన్ఫరెన్స్గా స్థాపించారు.[1] ఆస్ట్రేలియా, ఇంగ్లాండ్, దక్షిణాఫ్రికాలు దాని వ్యవస్థాపక సభ్యులు.
ప్రారంభంలో, కామన్వెల్త్లోని దేశాలు మాత్రమే దీనిలో చేరవచ్చుననే నిబంధన ఉండేది.[2] భారతదేశం, న్యూజిలాండ్, వెస్టిండీస్లు 1926లో చేరగా, భారతదేశ విభజన తర్వాత పాకిస్థాన్ 1953లో చేరింది.[3] 1961లో, దక్షిణాఫ్రికా కామన్వెల్త్ నుండి బయటికి పోయిన కారణంగా కాన్ఫరెన్స్కు రాజీనామా చేసింది.[2] అయితే, 1970లో అంతర్జాతీయ బహిష్కరణకు గురయ్యే వరకూ వాళ్ళు టెస్ట్ క్రికెట్ ఆడుతూనే ఉన్నారు.[4]
ఇంపీరియల్ క్రికెట్ కాన్ఫరెన్స్కు 1965లో ఇంటర్నేషనల్ క్రికెట్ కాన్ఫరెన్స్ అని పేరు మార్చారు. కామన్వెల్త్ వెలుపల ఉన్న దేశాలను మొదటిసారిగా పాలకమండలిలోకి ఎన్నుకోవడానికి అనుమతించే కొత్త నిబంధనలు తీసుకువచ్చారు. దాంతో ఫిజీ, అమెరికా ఆ సంవత్సరంలో మొదటి అసోసియేట్ సభ్య దేశాలుగా మారాయి.[2]
1981లో, శ్రీలంక పూర్తి సభ్యునిగా ఎన్నికైన మొదటి అసోసియేట్ సభ్యురాలు. టెస్టులు ఆడే దేశాల సంఖ్య ఏడుకు చేరుకుంది. 1989లో, ఐసిసి పేరు మళ్లీ మార్చారు. ఈసారి అంతర్జాతీయ క్రికెట్ కౌన్సిల్ అని మార్చారు.[2] 1991లో దక్షిణాఫ్రికా ఐసిసిలో పూర్తి సభ్యునిగా తిరిగి ఎన్నికైంది. జింబాబ్వే 1992లో ఎన్నికైంది.[3] బంగ్లాదేశ్ 2000లో ఎన్నికైంది.[3]
2017 జూన్ 22 న, ఐర్లాండ్, ఆఫ్ఘనిస్తాన్లకు పూర్తి సభ్య (అలాగే టెస్టు హోదా కూడా) హోదా లభించింది. దీనితో పూర్తి సభ్యుల సంఖ్య 12కి చేరుకుంది [5]
2022 ఆగస్టు నాటికి ఐసిసిలో, 12 పూర్తి సభ్యులు, 96 అసోసియేట్ సభ్యులతో 108 మంది సభ్యులు ఉన్నారు.[6]
సభ్యత్వం కోసం వచ్చే అన్ని అభ్యర్థనలను - పూర్తి, అసోసియేట్ రెండూ- ఆబ్జెక్టివ్ ప్రమాణాలకు తగినట్లుగా ఉన్నాయో లేదో మెంబర్షిప్ కమిటీ పరిశీలిస్తుంది. గతంలో మూడవ స్థాయిలో అఫిలియేట్ సభ్యత్వం ఉండేది. దాన్ని 2017 జూన్లో రద్దు చేసారు. అప్పటికి ఉన్న అఫిలియేట్ సభ్యులందరూ అసోసియేట్ సభ్యులుగా మారారు.[7] రెండంచెల వ్యవస్థను (పూర్తి సభ్యులు, అసోసియేట్ సభ్యులు) తీసుకువచ్చారు. కొత్త సభ్యులెవరైనా ముందు అసోసియేట్ మెంబరవుతారు. అంతర్జాతీయ పోటీలో జట్టు చూపిన ప్రదర్శన ఆధారంగా పూర్తి సభ్య హోదా పొందే అవకాశం ఉంటుంది.
2019 జూలై నుండి అక్టోబరు వరకు, ప్రభుత్వ జోక్యం కారణంగా ఐసిసి జింబాబ్వే క్రికెట్ను సస్పెండ్ చేసింది. పూర్తి సభ్య జట్టుకు ఇలా జరగడం ఇదే మొదటిసారి.[8][9][10]