PubMed

Ang PubMed ay isang bukas na makukuha at malayang database na pangunahing naglalaman ng MEDLINE, isang koleksyon ng mga sanggunian at abstrakto tungkol sa agham-buhay at mga paksang biyomedikal. Ang National Library of Medicine (NLM, o Pambansang Aklatan ng Medisina) ng Estados Unidos, na nasa ilalim ng National Institutes of Health (NIH, o Pambansang Institusyon ng Kalusugan), ang nangangasiwa sa database bilang bahagi ng sistemang Entrez para sa paghahanap ng impormasyon.^[1]

PubMed

Nilalaman
Lapat
Sentro ng Pagsasaliksik	United States National Library of Medicine (NLM, o Pambansang Aklatan ng Medisina)
Petsa ng pagkalabas	Enero 1996; 29 taon ang nakalipas (1996-01)
Pag-abot
Websayt	pubmed.ncbi.nlm.nih.gov
Gamit
Iba pa

Mula 1971 hanggang 1997, ang online na pagkuha sa MEDLINE ay isinasagawa sa pamamagitan ng kompyuter at linya ng telepono, na karaniwang ginagamit sa mga institusyong pasilidad tulad ng mga aklatan sa unibersidad.^[2] Noong Enero 1996, unang inilunsad ang PubMed, na sinumulan ang panahon para sa pribado, libre, at direktang paghahanap sa MEDLINE mula sa tahanan o opisina.^[3] Noong Hunyo 1997, opisyal na ginawang libre para sa publiko ang paggamit ng sistemang PubMed.^[2]

Mga katangian

Disenyo ng Websayt

Isang bagong interface ng PubMed ang inilunsad noong Oktubre 2009 na humikayat sa paggamit ng mga mabilisang paraan ng paghahanap na kahawig ng estilo ng Google; tinawag din itong mga telegram search.^[4] Sa karaniwan, ang mga resulta ay nakaayos ayon sa Pinakabago, subalit maaaring baguhin ito sa Pinakamainam na Tugma, Petsa ng Pagkakalathala, Unang May-akda, Huling May-akda, Dyornal, o Pamagat.^[5]

Ang disenyo ng websayt ng PubMed at ang domain nito ay isinapanahon noong Enero 2020 at naging paunang pili simula 15 Mayo 2020, kalakip ang mga bago at pinahusay na tampok.^[6] Nagkaroon ng negatibong reaksiyon mula sa maraming mananaliksik na madalas gumamit ng nasabing websayt.^[7]

Tagatukoy na PMID

Ang PMID (PubMed Identifier o PubMed Unique Identifier)^[8] ay isang natatanging bilang na buumbilang na nagsisimula sa 1 at itinalaga sa bawat tala sa PubMed. Ang PMID ay hindi katumbas ng PMCID (PubMed Central Identifier), na siyang tagatukoy para sa lahat ng gawaing inilathala sa PubMed Central na bukas sa publiko.

Ang pagkakatalaga ng isang PMID o PMCID sa isang publikasyon ay hindi nagsasabi ng anuman tungkol sa uri o kalidad ng nilalaman. Ang mga PMID ay ibinibigay hindi lamang sa mga peer-reviewed (sinuri ng kapwa dalubhasa) na artikulo, kundi pati na rin sa mga liham sa patnugot, opinyong editoryal, kolum ng opinyon, at iba pang bahagi ng dyornal na piniling isama ng patnugot. Ang pagkakaroon ng isang tagatukoy ay hindi rin garantiya na ang artikulo ay hindi binawi dahil sa pandaraya, kakulangan sa proseso, o maling asal. Maging ang mga anunsyo ng pagwawasto sa mga orihinal na artikulo ay maaaring tumanggap ng sarili nilang PMID.

Bawat bilang na ipinasok sa kahon ng paghahanap ng PubMed ay awtomatikong tinatrato bilang isang PMID. Kaya naman, anumang sanggunian sa PubMed ay maaaring matagpuan sa pamamagitan ng paggamit ng kaukulang PMID.