مریخ گاڑی
From Wikipedia, the free encyclopedia
مریخ گاڑی جسے مریخ نورد بھی کہا جاتا ہے، ایسی خودکار محرک گاڑی (motor vehicle) ہے جو مریخ کی سطح پر پہنچ کر خود بخود چلنے کے قابل ہے۔ عام آلوں (machines) کی نسبت یہ خودکار گاڑیاں زیادہ مفید ہوتی ہیں کہ یہ زیادہ رقبے کا مشاہدہ کر سکتی ہیں، انھیں مطلوبہ جگہوں تک بھیجا جا سکتا ہے، سرد موسم میں سورج کی روشنی تک پہنچ سکتی ہیں اور انھیں دور سے چلایا کر اس عمل میں بہتری بھی لائی جا سکتی ہے۔
اب تک مریخ پر چار ایسی خودکار گاڑیوں والی مہمات کامیابی سے بھیجی جا چکی ہیں۔ جیٹ پروپلشن لیبارٹری نے مارس پاتھ فائینڈر مہم بھیجی جس پر سویورنر نامی خودکار گاڑی شامل تھی جو اب کام نہیں کرتی۔ اس کے علاوہ مارس ایکسپلوریشن مشن کی تا حال فعال آپرچونیٹی، غیر فعال سپرٹ اور مارس سائنس لیبارٹری میں شامل کیوراسٹی کی نگرانی بھی اسی کی ذمہ داری ہے۔
24 جنوری 2014ء کو ناسا نے بتایا کہ کیوراسٹی اور آپرچونیٹی گاڑیوں اب مریخ پر قدیم حیات کے بارے شواہد جمع کرنا شروع کر رہی ہیں اور ایسی جگہیں تلاش کرنے کی کوشش کی جائے گی جہاں زمانہ قدیم میں پانی موجود ہو اور وہاں حیات ممکن ہو۔ اس وقت ناسا کے مشن کی بنیادی بات حیات کے قابل جگہیں، متحجرات اور نامیاتی کاربن کی تلاش ہے۔