Lenguajo de programasion
From Wikipedia, the free encyclopedia
On lenguajo de programasion l'è un lenguajo che esendo doparà da na persona, in sto caxo el programadore, el ghe dà la manjiera par scrivare (o programare), na serie de istrusion o seguense de ordini, soto forma de algoritmi, par controlar el conportamento de na machina, in xenare un computer, in manjiera da poder otegner difarenti tipi de dati. Sta intera union de comandi scriti, doparando el lenguajo de programasion, el njien ciamà programa. Ogni lengua la xe formada da un union de sinboli (ciamai alfabeto), la ga na serie de regole dure semanteghe, sintateghe, morfoloxeghe e lesicali, che le ga da esar rispetae co se scrive un programa par computer, descrivéndoghe prima la strutura e dopo el signifegà, che le xe neçesarie par speçifegar, sia el tipo de dati che serve par far laorar el programa, sia le asion chel programa el farà.
Par date motivasion, la programasion xe el proçeso de creasion de software fidabili, co la scritura, test, debug, conpilasion o interpretasion e mantegnimento del codaxe sorxente del xà dito codaxe. In poche parole, sto proçeso l'è definio doparando in manjiera logica i pasaji che vien:
- El xvilupo loxego del programa, par dar solusion a un problema particolar
- Scritura de la loxega del programa, doparando un lenguajo speçifego (codifega del programa)
- Compilasion o interpretasion del programa, fin a convertirlo in un lenguajo par machina
- Prova e coresion (se ghe xe erori) del programa
- Xvilupo de la documentasion
On eror comune, l'è chelo de pensar che i termini "lenguajo de programasion" e "lenguajo informadego" sia la stesa roba. El lenguajo informadego, ingloba el linguajo de programasion e altri, come HTML (el lenguajo de markup de pajine web, che no l'è par da vero un lenguajo de programasion, ma un union de istrusion che le fa in manjiera de struturar el conteguo dei documenti).
El lenguajo de programasion, el fa in modo de speçifegar co preçixion so che dati el ga da funsionar un software speçifego, come sti dati li garia da esar archiviai o traxmesi e che asion el software el garia da fare so un monton de situasion. Tuta sta roba, la njien fata co un lenguajo che tzerca de esar relativamente viçin al lenguajo uman, parché la carateristega relevante dei lenguaji de programasion, l'è proprio chelo che pì un programadore e la machina i dopara un lenguajo pì conpagno posibile, se xe in grado de far programi in manjiera senpre pì colaboradiva.