Chitara baritona

Ła ghitara baritona ła ze na variasion de ła ghitara normal, co na scała pì longa che ła permete na incordadùra pì basa.

Na ghitara Fender Jaguar baritona

Ła cordadùra standard de na ghitara (da ła corda più basa a cueła più alta) ła ze mi-la-re-sol-si-mi. Łe ghitare baritone łe ze sołitamente acordàe na cuinta giusta più in baso (la-re-sol-do-mi-la), na cuarta giusta più in baso (si-mi-la-re-fa♯-si), na tersa mazor più in baso (do-fa-la-re-sol-do) o na òtava più basa.

Łe ghitare baritone łe ga un corpo più łargo respeto a łe ghitare standard, masime in cazo de strumenti acùsteghi, e łe ga na scała più łonga che ła parmete a łe corde de èsar acordàe più base pur restando a na tension sirca guałìva a cueła de łe altre ghitare. Su na ghitara normal (acùstega, steel, ełètrega) ła łonghesa de ła scała (distansa tra blocacorde e pontezeło) ła ze pardesòłito conpreza intrà 24,9" e 25,7", e el spesor de łe corde in diametro el va da 0,012" a 0,054". Ła łonghesa de ła scała par racuante ghitare baritone ła varia invese da 27" a 30,5", e el spesor de łe corde da'l standard 0,012"-0,054" a 0,017"-0,095".

Sostansialmente łe ghitare baritone łe ze sìmiłi a łe ghitare normałe ma co mazor vołume a łe medie frecuense, par el fato che ła łonghesa mazor de ła scała e łe corde più pezanti da un tinbro più baso a'l strumento. Łe ze sonàe pardesòłito co'l mètodo "tic-tac bass" in cui na ghitara baritona zmorsada ła radopia łe parte sonàe da ła ghitara baso o da'l contrabàso. El mètodo el ze usà speso inte ła mùzega country

Istoria

Ła só prima aparision se ła ga avesto inte'l mondo de la mùzega clàsega. L'azienda mericana Danelectro ła ze stà ła prima a prezentar ła ghitara ełètrega baritona su'l fenìr de i ani sincuanta. Poco dopo anca ła Fender la ga rełasà el Bass VI che'l połe èsar descrivesto sia cofà na ghitara barìtona che come na chitara baso.

Ła ghitara baritona su'l scominsio no la ga avùdo suceso infrà i muzeghisti e i ascoltadori. Drioman parò el strumento el ga tacà a conparìr inte ła surf music, nonché cofà sotofondo inte łe colone sonore de tanti film, masime inte i spaghetti western. Inte ła storia più resente ła ghitara baritona ła ga trovà posto inte'l rock e inte'l metal. Łe ghitare baritone łe ga anca ła capasità de èsar uzàe come ghitare baso se sonàe coretamente.

Gretsch, Fender, Gibson (EB-6), Jerry Jones, Burns London e un mucio de altre dite łe gà produzesto ghitare baritone insinaménte da i ani sesanta, seben sempre in picołe cuantità a càuza de ła basa popołarità de'l strumento.

Łe band metal łe ga tacà a uzar ła ghitara baritona inte i primi ani novanta, non apena ga scominsià a deventar popołare łe incordaùre zbasàe ("down-tune" o "drop-tune").

Ła mèdema Prs, ła ga in produsion na ghitara baritona dedicada a Ben Burnley, el cantante-ghitarista-conpozidor-fondador de i Breaking Benjamin.

Ghitaristi baritoni

Ła ghitara baritona ła ze stà doparada inte łe rezistrasion da Merle Haggard, Johnny Cash, Wes Borland, Dwight Yoakam, George Jones, e Willie Nelson, speso radopiando ła parte de'l baso acùstego.Brian Wilson el ga speso inserìo ghitare baritone inte i só aranzamenti par i The Beach Boys, come in "Dance, Dance, Dance" o "Caroline, No". Anca el cantante Folk-Pop Jimmie Rodgers el preferiva ła ghitara baritona, che ła pol èsar scoltada inte łe batùe inisiałi de "Woman from Liberia". Ian Mackaye el uzava na ghitara baritona cuando che'l sonava co i só The Evens.

El ghitarista Jazz Pat Metheny el ga utiłizà de łe ghitare baritone prodote da Linda Manzer inte'l só àlbun sołista de'l 2003 One Quiet Night. Anca Ani DiFranco el sonava speso ghitare baritone, incluze cuełe de produtori cofà David Berkowitz, Joe Veillette e Alvarez, uzando frecuentemente cordadùre alternative.

Clifton Hyde el gà zontà ła só ghitara acùstega baritona a łe mùzeghe de Sigur Rós, Gato Loco, e Pape Armond Boye. Dylan Carlson de'l grupo drone metal Earth el sona na ghitara baritona inte l'LP del 2005 Hex (Or Printing in the Infernal Method). Nico Audy-Rowland de i Trocadero el ze conosùo anca par el sonar na ghitara baritona Danelectro durante el só łaoro par el tema musical de ła serie machinima Red vs. Blue.

Pete Loeffler de i Chevelle el uza na PRS Custom 22's,24's co mànego baritono oltra a do Fender Stratocaster Baritones. Ko Melina de i The Dirtbombs el sona na Fender Jaguar Baritone Custom.

Łe baritone łe ze stà anca uzàe da'l grupo ingleze The Cure inte ła proudusion de'l só primo àlbun Faith inte'l 1981. Teppei Teranishi de i Thrice el sona na ghitara baritona inte ła mazor parte de l'àlbun The Alchemy Index. Dave Matthews el sona na baritona in serte canson, cofà "The Space Between" e "Some Devil". Parker Lauzon dei Evans Blue el usa un Ibanez baritona inte el segondo album The Pursuit Begins When This Portrayal of Life Ends in "Shine Your Cadillac", "Q", "Pin-Up", "Fear", e "The Pursuit". Brian 'HEAD' Welch el uza Ibanez baritone inte'l só àlbun de debuto da sołista Save Me From Myself. Chest Rockwell el uza na ghitara baritona inte ła só canson "Body Prop 3".

El muzeghista viazador austrałian (za menbro de The Stu Thomas Paradox, Dave Graney, Kim Salmon, The Brass Bed) el ga utiłizà na ghitara baritona Barracuda par un serto nùmaro de ani, sonando asołi, e co i The Lurid Yellow Mist insembre a Dave Graney & Clare Moore, Kim Salmon e Billy Miller de i The Ferrets. Anca Kazu de i Blonde Redhead da'l vivo el uza na ghitara baritona.

Da'l 2006 anca i Breaking Benjamin i fa uzo de łe chitare Prs baritone, co incordadùra tanto basa, che ła garantise un son comuncue potente e enorme, clàsego de 'sto grupo.

Altri progetti

• Wikimedia Commons

• Wikimedia Commons el detien imàjini o altri file so Chitara baritona
• Scholia el detien schemi gràfeghi so Chitara baritona