From Wikipedia, the free encyclopedia
Hobart (mugazo anglijan kelel, virktas [ˈhoʊbɑːrt]) om Avstralijan lidn da valdmeriport. Se sijadase Tasmanii-saren suvipäivnouzmas, om Tasmanii-štatan pälidnaks.
Eländpunktan aluz om pandud vn 1804 20. päiväl uhokud (kahtendeks Sidnein jäl'ghe) kuti türm Suren Britanijan ogernikoiden täht. Nimitihe Britanižen imperijan soda- da kolonijoiden azjoiden ministran Hobart-lordan oiktastuseks, ezmäi Hobart Town, Hobarton. Hobart sai «siti»-statusad vn 1842 21. päiväl elokud.
Nügüd' lidn om laivansauvomižen edheotandoiden päsija, rahvahidenkeskeižen turizman järed keskuz, laivoiden oigendusen keskuz Antarktidha. Ende Hobart oli kitoiden samižen päportaks.
Hobart sijadase Deruent-jogen (angl. Derwent) estuarijan randoil. Kunanii/Vellington-mägi seižub 15 km päivlaskmha lidnan azjaližes keskusespäi, mägi om 1271 m kortte.
Klimat om ven valdmeren. Vilukun da uhokun lämuz om +16,8 C°, heinkun +8,2 C°. Voden keskmäine lämuz om +12,6 C°. Minimaline registriruidud lämuz om −2,8 C°, mägen päl — −9,1 C°. Paneb sadegid 616 mm vodes, läz tazomäras vodes läbi.
Vn 2016 rahvahanlugemižen mödhe lidnan ristitišt ezilidnoidenke (Sur' Hobart) oli 222 356 eläjad vai Tasmanijan kaks' videndest, ičeze Hobart-lidnan — 50 439 eläjad. Suren Hobartan ristituiden videndez om sündnu verhiže maihe.
Lidnan edeližed pämehed oliba Sju Hikki (2014 kül'mku − 2018 keväz'ku) i Ron Kristi (2018).
Avtobusad da venehed oma kundaližeks transportaks lidnan südäimes.
Hobartan rahvahidenkeskeine civiline lendimport (HBA, 2,4 mln passažiroid 2016−17 finansižel vodel) sijadase Kembridž-ezilidnas, 17 km pohjoižpäivnouzmha lidnan keskusespäi. Sišpäi tehtas reisid Avstralijan surihe lidnoihe, jügureisid Kitaihe.
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.