Manas (lidn)

Manas (kirg.: Манас [mɑnɑs], ven.: Мана́с; edel vn 2025 sügüz'kun 27. päiväd Džalal-Abad, kirg.: Жалал-Абад, ven.: Джала́л-Аба́д, uzb.: Jalolobod) om lidn da kurort Kirgizstanan päivlaskmas. Se om valdkundan koumanz' lidn eläjiden lugun mödhe, Džalal-Abadan agjan administrativine keskuz (vspäi 1991).

Manas
Манас (kirg. i ven.)

Lidnanznam	Flag
Valdkund	Kirgizstan
Eläjiden lugu (2021)	123,239 ristitud
Pind	88 km²
Pämez'	Muratali Tagaev (kezaku 2018—)
Telefonkod	[phone]
Aigvö	UTC+6

Istorii

Eländpunktan aluz om pandud vl 1870 kuti kišlak tervehtajidenno purtkidenno. Se sai lidnan statusad vl 1877. Raudte ühtenzoiti lidnad Andižananke vl 1915. Vll 2002−2008 oficialine nimituz oli Žalalabat (kirg.: Жалалабат). Vn 2025 udesnimituz om tehtud kirgizan eposan i sen vägimehen Manas-nimen mödhe.

Manas šingotase kivivoin i mecan ümbriradmižel, puvillan kuidun pästandal, sauvondmaterialiden tehmižel (mouckiven samine, savičuntegim), mašinansauvomižel (pompad), sömtegimištol (jauh, vin), tabakon edheotandoil, mugažo mebel'fabrik radab. Nevondkundaližes aigaspäi kurort radab lidnas südäikohtsoliden traktan i ginekologijan läžujiden tervhuden spravitandan täht.

Geografijan andmused

Lidnan (enččenke nimenke) sijaduz agjas i valdkundas vn 2010 kartal

Lidn sijadase agjan suves, Ferganan alangišton pohjoižpäivnouzmaižel röunal, Tän'-Šan'-mägisel'gan ezimägištol, 763 m ü.m.t. keskmäižel korktusel. Matkad Biškek-pälidnhasai om 560 km pohjoižpäivnouzmha.

Eläjad

Vn 2009 Kirgizstanan rahvahanlugemižen mödhe lidnan eläjiden lugu oli 89,004 ristitud 24,6 nellikkilometrad pindal, vn 2021 — 123,239 ristitud. Kaik 109,200 eläjad oli lidnas vl 2017. Kaikiš suremb lidnan ristitišt om nügüd'.

Rahvahad (2009): kirgizlaižed — 74,7 %, uzbekad — 18,0 %, venänikad — 3,4 %, totarlaižed — 1,2 %, uigurad — 0,6 %, toižed rahvahad — 2,1 %.

Džalal-Abadan valdkundaline universitet radab lidnas.